چوبیس سالہ پاکستانی حسینہ عالمی مقابلہ حسن میں شرکت کریں گی

عبدالسلام علی سے

لاہور: عالمی مقابلہ حسن میں  پاکستان پہلی مرتبہ باضابطہ طورپر شرکت کرے گا۔ چوبیس سالہ پاکستانی لڑکی انیکا جمال ملک کی نمائندگی کریں گی۔

انیکا جمال اقبال کو مس ورلڈ پاکستان 2026 کا تاج پہنایا گیا۔ 24 سالہ انیکا اکاؤنٹنگ اینڈ آڈیٹنگ میں ماسٹرز کی طالبہ ہیں اور پاکستان کی نمایاں بین الاقوامی بیوٹی کوئنز میں شمار ہوتی ہیں۔تاج پوشی کی تقریب لاہور کے  مقامی ہوٹل میں منعقد ہوئی، جہاں ڈاکٹر شفق اختر، مس پاکستان یونیورسل 2022، نے انیکا کو تاج پہنایا۔

انیکا جمال اقبال اس سے قبل بھی متعدد عالمی مقابلوں میں پاکستان کی نمائندگی کر چکی ہیں، جن میں مس ارتھ، مس گلوبل، مس کاسمو، مس ایکو انٹرنیشنل اور مس آورا انٹرنیشنل شامل ہیں۔

اس کے علاوہ انہوں نے کوسووو میں منعقد ہونے والے فریڈم آف دی ورلڈ مقابلے میں چار اعزازات اپنے نام کیے، جس کے باعث انہیں پاکستان کی کامیاب ترین بین الاقوامی مقابلۂ حسن کی نمائندہ خواتین میں شمار کیا جاتا ہے۔

بین الاقوامی مقابلوں میں کامیابیوں کے ساتھ ساتھ انیکا سماجی خدمت کے شعبے میں بھی فعال کردار ادا کر رہی ہیں۔ بیوٹی ود اے پرپز پروگرام کے تحت ان کی مہم پاکستان میں تھیلیسیمیا کے مریضوں کی معاونت پر مرکوز ہے۔

وہ نجی تنظیموں کے ساتھ رضاکارانہ خدمات انجام دیتے ہوئے ایسے مریضوں کی مدد کر رہی ہیں جنہیں مسلسل طبی سہولیات اور نگہداشت کی ضرورت ہوتی ہے۔پاکستان کی پہلی شرکت نہ صرف ملکی مقابلۂ حسن کی تاریخ کا ایک اہم باب ہے بلکہ عالمی سطح پر پاکستان کی نمائندگی کے حوالے سے بھی ایک غیرمعمولی پیش رفت تصور کی جا رہی ہے۔