عاطف اسلم نئی البم ’صبح آئے نا‘ ریلیز کریں گے, تاریخ سامنےآگئی

کراچی: گزشتہ دو دہائیوں سے زائد عرصے سے موسیقی کی دنیا پر راج کرنے والے نامور پاکستانی گلوکار عاطف اسلم 31 جولائی کو اپنی نئی میوزک البم ’صبح آئے نا‘ ریلیز کرنے جا رہے ہیں۔

اسپاٹیفائی کے تازہ اعداد و شمار کے مطابق عاطف اسلم کے گیت اب تک تقریباً 8 ارب مرتبہ سنے جا چکے ہیں، جبکہ ان کے ماہانہ سامعین کی تعداد 3 کروڑ سے تجاوز کر چکی ہے۔ ان کی موسیقی دنیا کے 184 ممالک میں باقاعدگی سے سنی جاتی ہے۔

گزشتہ ایک سال کے دوران ان کے 96 فیصد اسٹریمز پاکستان سے باہر، خصوصاً مشرقِ وسطیٰ، شمالی امریکا، یورپ اور ایشیا پیسیفک سے آئے، جبکہ ان کے سامعین میں 85 فیصد نوجوان نسل (Gen Z) پر مشتمل ہے۔ اسی عرصے میں 4 کروڑ 10 لاکھ سے زائد نئے اور پرانے صارفین نے ان کی موسیقی سنی، جبکہ ان کے گیت 3 کروڑ 75 لاکھ سے زائد ذاتی پلے لسٹس کا حصہ بنے۔

اپنی نئی البم کے بارے میں عاطف اسلم کا کہنا ہے کہ ’صبح آئے نا‘ ان کی اندرونی کشمکش سے خود شناسی تک کے سفر کی عکاس ہے۔ انہوں نے کہا کہ وہ اس البم کو مداحوں کے سامنے پیش کرنے کے لیے بے حد پرجوش ہیں۔

31 جولائی کو ریلیز ہونے والی اس آٹھ گیتوں پر مشتمل البم میں صبح آئے نا، سفر میں ہوں، عشق، لیٹس ہیو سم فن، سن سجنا، ہوں عشق میں، چار یار اور سچے وعدے شامل ہیں۔