سندھ کے علاوہ تمام صوبوں میں امتحانات شیڈول کے مطابق ہونگے، شفقت محمود

بین الصوبائی وزرائے تعلیم اجلاس کے بعد پریس کانفرنس کرتے ہوئے وفاقی وزیرتعلیم شفقت محمود نے کہا کہ تمام سرکاری و نجی ا سکولوں کو ایک دن میں 50 فیصد طلبا کو بلانے کی اجازت ہو گی۔ وزرائے تعلیم سے درخواست کی گئی کہ  یونیورسٹی کے طلبہ  اور اساتذہ کی ویکسی نیشن کی جائے۔

مزید پڑھیں: پنجاب بھر کے اسکولوں میں ویکسی نیشن لازمی قرار

شفقت محمود نے کہا کہ سندھ   میں 8اگست تک تمام تعلیمی ادارے بند رکھے جائیں گے، سندھ کے علاوہ  تمام صوبوں میں امتحانات شیڈول کے مطابق ہوں گے، اسکولوں سے متعلق عملے کی ویکسی نیشن بھی ضروری ہے۔ ملک بھر کے جامعات میں31اگست تک ویکسی نیشن لازمی قرار دیدی گئی ہے۔

وزیر تعلیم نے کہا کہ 25تاریخ کو صورتحال کا دوبارہ جائزہ لیا جائے گا، اگلی میٹنگ25اگست کوہوگی۔ ہماری پوری کوشش ہے کہ بچوں کی صحت اور تعلیم کا خیال رکھا جائے، امتحانات میں لازمی مضامین میں 5فیصد اضافی نمبر زدیئے جائیں گے۔