وزیر اعظم کی رحیم یار خان میں مندر حملے کی مذمت

وزیر اعظم عمران خان نے سماجی رابطے کی ویب سائٹ ٹوئٹر پر ایک ٹویٹ میں کہا کہ میں رحیم یار خان میں بھونگ کے مقام پر واقع گھنیش مندر پر کل کے حملے کی شدید مذمت کرتا ہوں۔میں نے پہلے ہی آئی جی پنجاب کو تمام ملزمان کو گرفتار کرنے کے احکامات دے رکھے ہیں۔

میں رحیم یار خان میں بھونگ کے مقام پر واقع گھنیش مندر پر کل کے حملے کی شدید مذمت کرتا ہوں۔ میں پہلے ہی آئی جی پنجاب کو ذمہ داروں کی گرفتاری یقینی بنانے اور پولیس کیجانب سے کسی غفلت پرسخت کارروائی عمل میں لانے کی ہدایات دے چکا ہوں۔ حکومت مندر بھی بحال کرے گی۔

— Imran Khan (@ImranKhanPTI) August 5, 2021

وزیراعظم نے کہا کہ  حکومت متاثرہ مندر کو بحال کرے گی،پولیس کی طرف سے کوئی کوتاہی ہوئی تو اس کیخلاف بھی کارروائی کی جائے گی۔

دوسری جانب  وزیراعلی پنجاب سردار عثمان بزدار نے رحیم یار خان کے علاقے بھونگ میں مندر میں توڑ پھوڑ کے واقعہ کا نوٹس  لے لیا ہے۔ کمشنر بہاولپور ڈویژن ا ورآر پی او بہاولپور سے رپورٹ طلب  کرلی ہے اور  واقعہ کی جامع تحقیقات کا حکم  دیا گیا ہے۔

"کسی کو قانون ہاتھ میں لینے کی اجازت نہیں دی جا سکتی۔ مندر میں توڑ پھوڑ کرنے میں ملوث مجرمان قانون کی گرفت سے نہیں بچ سکیں گے-
اقلیتوں کی عبادت گاہوں کا تحفظ ریاست کی ذمہ داری ہے اور پنجاب حکومت ہر صورت میں یہ یقینی بنائے گی" - وزیراعلیٰ @UsmanAKBuzdar

— Government of Punjab (@GovtofPunjabPK) August 5, 2021

عثمان بزدار  نے کہا کہ  توڑ پھوڑ کے واقعہ کی غیر جانبدارانہ تحقیقات کر کے رپورٹ پیش کی جائے، توڑ پھوڑ کرنے والے عناصر کے خلاف قانونی کاروائی کی جائے۔ کسی کو قانون ہاتھ میں لینے کی اجازت نہیں دی جاسکتی۔پاکستان میں اقلیتوں کی عبادت گاہوں کا تحفظ ریاست کی ذمہ داری ہے ، قائد اعظم ؒ کے پاکستان میں بسنے والی اقلیتوں کو برابر کے حقوق حاصل ہیں ۔