برطانیہ نے نواز شریف کی ویزا توسیع کی درخواست مسترد کردی

ذرائع کے مطابق برطانوی حکام نے سابق وزیر اعظم نواز شریف کی ویزا توسیع کی درخواست مسترد کری ہے۔برطانوی ہوم ڈیپارٹمنٹ  نے نواز شریف کی ویزا توسیع کی درخواست مسترد کی۔لاہورہائیکورٹ نے نوازشریف کوطبی بنیادوں پر4ہفتوں کیلئے لندن جانے کی اجازت دی تھی، وفاقی حکومت نے بھی نوازشریف کو میڈیکل گراؤنڈ پر بیرون ملک جانے کی اجازت دی تھی۔سابق ویزراعظم نواز شریف کے پاس اپیل کا حق موجود ہے۔

خیال رہے کہ نواز شریف کا پاسپورٹ حکومت پاکستان پہلے ہی مسترد کرچکی ہے۔

 پاکستان مسلم لیگ (ن) کی ترجمان مریم اورنگزیب کا محمد نوازشریف کے برطانیہ میں قیام سے متعلق اہم بیان سامنے آیا ہے،انہوں نے بیان میں کہا ہے کہ  قائد محمد نوازشریف کے ویزے   میں مزید  توسیع سے برطانوی محکمہ داخلہ نے معذرت کی ہے ، برطانوی محکمہ داخلہ کے فیصلے میں لکھا ہے کہ محمد نوازشریف اس فیصلے کے خلاف امیگریشن ٹریبونل میں اپیل کرسکتے ہیں۔

مریم اورنگزیب نے کہا کہ قائد محمد نوازشریف کے وکلاءنے برطانوی امیگریشن ٹریبونل میں اپیل دائر کردی ہے،برطانوی امیگریشن ٹریبونل میں دائر اپیل پر فیصلہ ہونے تک محکمہ داخلہ کا حکم غیرموثر رہے گا ، اپیل پر فیصلہ ہونے تک قائد محمد نوازشریف برطانیہ میں قانونی طورپر مقیم رہ سکتے ہیں۔