خیبرپختونخواہ میں کورونا کے باعث ایک اورڈاکٹر جاں بحق

خیبرپختونخوا کے ضلع پشاورسے تعلق رکھنے والے   ایک  اور ڈاکٹر   کووڈ-19 کے باعث انتقال کرگئے، جس کے بعد صوبے میں کورونا سے انتقال کرنے والے ڈاکٹروں کی مجموعی تعداد 69ہوگئی۔ پراونشل ڈاکٹرز ایسوسی ایشن کے مطابق ڈاکٹر احسان الحق  گزشتہ تین دنوں سے ایوب میڈیکل  کمپلیکس ہسپتال ایبٹ اباد کے کورونا وارڈ میں داخل تھے، ڈاکٹر احسان الحق  کی نماز جنازہ  انکے آبائی گاوں   میں ادا کی جائے  گی ۔ ڈاکٹر احسان الحق  ڈپٹی ڈائریکٹر میڈیکل سروسز پتھالوجی ایوب میڈیکل کمپلیکس میں تعینات تھے۔

پراونشل ڈاکٹرز ایسوسی ایشن کے مطابق خیبر پختون خواہ میں شہدا ڈاکٹرز اور دیگر ہیلتھ ملازمین تاحال گزشتہ سال اپریل سے منظور شدہ شہدا پیکیج سے محروم ہے۔

واضح رہے کہ پاکستان میں کورونا کی چوتھی لہر اور ڈیلٹا ویرینٹ کے پھیلاؤ سے بڑی تعداد میں ڈاکٹرز اور پیرا میڈیکل اسٹاف بھی متاثر ہوا ہے جبکہ ملک بھر  میں وائرس کے مثبت کیسز کی شرح  میں بھی تیزی سے اضافہ ہوا  ہے۔

عالمی سطح پر کورونا سے ہلاک ہونے والے طبی عملے کی بات کی جائے تو ڈبلیو ایچ او کے مطابق دنیا بھر میں کورونا وبا کے پھیلاؤ سے اب تک ایک لاکھ 15 ہزار سے زائد ہیلتھ اور کیئر ورکرز جان کی بازی ہار چکے ہیں۔