پاکستان کو سرحدوں سے کوئی نقصان نہیں پہنچ سکتا : شیخ رشید

 تفصیلات کے مطابق نادرا ہیڈ کوارٹر اسلام آباد میں وفاقی وزیرداخلہ شیخ رشید نے پریس کانفرنس کرتے ہوئے کہا کہ بھارتی وزیرِ داخلہ کے بیان کی تردید کرتا ہوں، انہوں نے غیر ذمے دارانہ بیان دیا۔ ان کاکہنا تھا کہ بھارت ہمارے لیے ایسٹ اور ویسٹ دونوں طرف مشکلات پیدا کرنا چاہتا ہے۔ اسرائیل، را اور این ڈی ایس کا ایجنڈا پاکستان کو اندر سے کمزور کرنے کا ہے۔ افغانستان کے ساتھ پاکستان کی تمام سرحدیں بند ہیں، ہمارا افغانستان کی سیاست سے کوئی تعلق نہیں، ہم امن کے داعی ہیں، افغانستان جانے، افغانوں کا مسئلہ جانے۔

انہوں نے کہا کہ مقبوضہ کشمیر میں کسی دہشت گرد کے جانے کا سوال ہی پیدا نہیں ہوتا، ہماری تمام ہمدردیاں مقبوضہ کشمیر کے عوام کے ساتھ ہیں۔

وزیرِ داخلہ نے کہا کہ جعلی شناختی کارڈ بنانے میں ملوث تمام افراد کو نادرا کے محکمے سے نکالیں گے، جو لوگ نور مقدم کیس میں ملوث ہیں ان کا نام ای سی ایل میں ڈال دیا گیا ہے۔ نادرا کو چلانے کیلئے وزیراعظم سے گائیڈ لائنز لیں گے ،وزیراعظم کو جلد نادرا کے دورے کی دعوت دیں گے۔

شیخ رشید نے محرم الحرام  کے موقع پر سیکیورٹی کے حوالے سے  بتایا کہ محرم الحرام کے لیے فول پروف سیکیورٹی کا انتظام کر رہے ہیں، کسی کے عقیدے کو چھیڑیں گے نہیں اور اپنا عقیدہ چھوڑیں گے نہیں۔شیخ رشید نے کہا کہ درخواست ہے کہ محرم میں این سی او سی کی ایس او پیز کو فالو کریں، آج سے 10 محرم تک سابق فاٹا میں انٹر نیٹ بند رکھا جائے گا۔ قومی سلامتی کا تقاضہ ہے کہ ہر کوئی اپنی ذمہ داری ادا کرے۔