چین : 7سال کے بچوں کے تحریری امتحانات پر پابندی عائد

خبر ایجنسی کے مطابق چینی وزارت تعلیم نے اس حوالے سے ایک بیان میں کہا ہے کہ   6 سے7سال کےطالبعلم کےامتحان پر پابندی کا مقصد انہیں غیر ضروری دباؤ سے آزاد کرنا ہے،کیونکہ  مستقل امتحانات طلبہ پر بہت زیادہ بوجھ اور  دباؤ کا باعث  بنتے ہیں۔چینی وزارت تعلیم کے بیان کے مطابق  جونیئر ہائی اسکول میں مڈٹرم، موک امتحانات کی اجازت ہوگی جبکہ لازمی تعلیم کے دیگر سالوں میں امتحان، صرف ایک ٹرم تک محدود ہوگا۔

چین کے سوشل میڈیا پلیٹ فارم ویبو پروالدین کی جانب سے ملا جلا ردعمل دیکھنے میں آرہا ہے جس میں  یہ خیال کیا جا رہا ہے کہ یہ بچوں پر دباؤ کم کرنے کے لیے صحیح سمت میں ایک قدم ہے۔ دوسر ی جانب یہ بھی سوال اٹھایا گیا کہ سکول بغیر امتحانات کی صلاحیتوں کی جانچ اور پیمائش کیسے کریں گے۔یہ اعلان چین کے تعلیمی شعبے میں وسیع اصلاحات کا حصہ ہے۔

خیال رہے کہ جولائی میں چین میں تمام نجی ٹیوٹرنگ فرم کو نان پرافٹ ہونے کا حکم دیا گیا تھاجبکہ  بیجنگ میں گزشتہ ہفتے اعلیٰ صلاحیتوں کے اساتذہ کے ایک ہی جگہ ارتکاز کو روکنے کیلئے اسکول اساتذہ کو ہر 6 سال میں ذمہ داریاں تبدیل کرنے کا حکم دیا گیا تھا۔ رواں سال کےآغاز میں چین میں پہلی اور دوسری جماعت کے تحریری ہوم ورک اور جونیئرہائی اسکول کےطلبا کو ڈیڑھ گھنٹے سے زائد کا ہوم ورک دیئے جانے پر بھی پابندی  نافذ کی گئی تھی۔