تمام معاشی اعشاریے مثبت سمت میں بڑھ رہے ہیں، وزیراعظم

تفصیلات کے مطابق  وزیراعظم عمران خان کی زیرصدارت ملکی برآمدات کا حجم بڑھانے کے لیے حکومتی اقدامات کےحوالے سے جائزہ اجلاس ہوا، جس میں  قومی سلامتی کےمشیرڈاکٹرمعید یوسف، ڈاکٹرشہبازگل، کامرس ڈویژن اورتوانائی ڈویژن کےحکام اورسینئراہلکارشریک ہوئے۔

وزیر اعظم کو بریفنگ میں بتایا گیا کہ  پاکستان کی موجودہ برآمدات کے حجم میں مجموعی طور پر 30 ارب ڈالر کا اضافہ ممکن ہے،  برآمدات بڑھانے آئی ٹی، ٹیکسٹائل، ادویات، پولٹری، چاول ، سبزیاں اورمیواجات کی برآمدات پرتوجہ دینے کی ضرورت ہے، ‏  چمڑا، نمک، سنگ مرمر، سرا میکس اور سرجیکل اوزارسمیت 19 مصنوعات پربھی توجہ دینے کی ضرورت ہے، تمام شراکت داروں بشمول صنعتکاروں، برآمد کنندگان اور متعلقہ سرکاری اداروں سے مشاورت کا عمل جاری ہے۔

وزیر اعظم عمران خان نے کہا کہ  تمام معاشی اعشاریے مثبت سمت میں بڑھ رہے ہیں،  درآمدات اور برآمدات کے درمیان فرق کوکم کرنے کے لئے ہنگامی اقدامات اٹھانے کی اشد ضرورت ہے، حکومت برآمد کنندگان کے لیے آسانیاں پیدا کر رہی ہے۔

وزیراعظم نے کامرس ڈویژن کو ہدیات دی ہے کہ  غیرممالک میں تعینات پاکستان کے ٹریڈ اینڈ انویسٹمنٹ افسران کے لیے اہداف متعین کئے جائیں، کامرس ڈیویژن اگلے دو ہفتوں میں اسٹریٹیجک ایکسپورٹ فریم ورک منظوری کے لیے پیش کرے۔

وزیر اعظم  کا کہنا تھا کہ  پاکستانی برآمدات میں اضافے کے ضمن میں  مارکیٹ اور مصنوعات میں تنوع لانا موجودہ حکومت کی اولین ترجیح ہے،پاکستانی کاروباری برادری میں بےشمار پوٹینشل  موجود ہے،کاروباری برادری کو موافق فضا  اور کاروبار دوست پالیسیوں کی فراہمی حکومت کی اولین ترجیح ہے،حکومت کاروباری برادری کی مشاورت سے پالیسیوں کی تشکیل کے فلسفے پر عمل پیرا ہے۔

 وزیراعظم عمران خان نے کہا کہ  حکومت اور انڈسٹری کی مضبوط پارٹنر شپ کا سلسلہ جاری رہے گا،حکومت کاروباری برادری کو ہر ممکنہ سہولت فراہم کرنے کی پالیسی پر سختی سے عمل پیرا ہے،حکومت کاروباری برادری سے توقع کرتی ہے کہ وہ ان مواقع کا بھرپور فائدہ اٹھائیں،کاروباری برادری ملکی معیشت کے استحکام میں حکومت کا بھرپور ساتھ دیں۔