طالبان کی عبوری حکومت کی تقریب حلف برداری منسوخ

غیر ملکی خبر رساں ادارے کے مطابق   طالبان نے عبوری حکومت کی تقریب حلف برداری منسوخ کردی، طالبان کے ثقافتی کمیشن کے رکن انعام اللہ سمنگانی کا کہنا ہے کہ  عوام کو مزید کنفیوژ نہیں رکھنا چاہتے، کابینہ نے کام شروع کردیا ہے۔

طالبان کے رکن نے اپنے ٹویٹر پیج پر ایونٹ کی مزید تاریخ بتائے بغیر لکھا کہ نئی افغان حکومت کی افتتاحی تقریب چند روز قبل منسوخ کر دی گئی تھی۔ لوگوں کو مزید الجھن میں نہ ڈالنے کے لیے  امارت اسلامیہ کی قیادت   نے کابینہ کا اعلان کردیا ہے اور  یہ پہلے ہی کام  شروع  کرچکے ہیں ۔

مزید پڑھیں : یو اے ای جانیوالوں کیلئے خوشخبری ، بڑی پابندی ختم

انہوں نے  اس سے قبل پھیلائی گئی معلومات کی تردید کی کہ افتتاح 11 ستمبر کو ہونے والا تھا  اور  اسے افواہیں قرار دیا ہے۔

قبل ازیں  روس نے طالبان کی عبوری حکومت کی تقریب حلف برداری میں شرکت نہ کرنے کا اعلان کیا تھا۔

خیال  رہے کہ طالبان کی جانب سے 7 ستمبر 2021 کو عبوری حکومت کا اعلان کیا گیا تھا جس میں ملا محمد حسن اخوند کو افغانستان کا وزیراعظم جبکہ ملا عبدالغنی برادر اور مولوی عبدالسلام حنفی کو نائب وزرائے اعظم مقرر کیا گیا تھا۔

یاد رہے کہ 15 اگست کو طالبان افغان دارالحکومت کابل میں داخل ہو گئے تھے اور ملک کے صدر اشرف غنی قریبی ساتھیوں سمیت فرار ہو گئے تھے اور طالبان نے   دارالحکومت کا کنٹرول سنبھال لیا تھا۔