آئندہ الیکشن نئی مردم شماری کے تحت  ہونگے : اسد عمر

تفصیلات کے مطابق کراچی میں پی ٹی آئی رہنما او وزیر بحری امورعلی زیدی کے ہمراہ پریس کانفرنس کرتے ہوئے وزیر منصوبہ بندی  اسد عمر نے کہا ہے  کہ  مشترکہ مفادات کونسل کی منظوری کے بعد مردم شماری پر کام شروع کر دیا جائے گا، آئندہ الیکشن نئی مردم شماری کی بنیاد پر ہوگا، جس میں عمران خان ہی وزیرِ اعظم ہوں گے۔ان کا کہنا  تھا کہ کراچی کی مردم شماری دیرینہ مسئلہ رہاہے ۔ اس بار مردم شماری میں پہلی  مرتبہ جدید ٹیکنالوجی استعمال کی جائے گی۔ مردم شماری  پر تمام اسٹیک  ہولڈرز سے بات  کریں گے۔

انہوں نے کہا کہ ایک سال پہلے وزیرِ اعظم عمران خان نے کراچی کے لیے تاریخی پیکیج کا اعلان کیا تھا، کراچی کے لیے گرین لائن منصوبہ مکمل ہو چکاہے، اگلے 1 ماہ میں بقیہ کام مکمل ہو جائیں گے۔اسد عمر نے بتایا کہ 40 بسیں اگلے ہفتے تک کراچی کی بندرگاہ پہنچ جائیں گی، گرین لائن بس منصوبے کے لیے ڈرائیو بھرتی کیئے جائیں گے، اکتوبر کے آخر تک 40 بسوں سے گرین لائن کھول دی جائے گی۔

وفاقی وزیر اسد عمر نے بلاول بھٹو کے بیان پر تنقید کرتے ہوئے کہا ہے کہ حکومتیں کام کریں تو بارش  کاپانی نقصان پہنچائے بغیر نکل بھی جاتا  ہے ۔بلاول زرداری نے ٹھیک  کہا کہ جب بارش ہوتی ہے  تو پانی آتاہے۔ جب حکومتیں اپنا کام کرلیں تو بارش کے باعث آ نے والا زیادہ پانی نقصان پہنچائے بغیر آ کر گزر بھی جاتا ہے۔

انہوں نے کہا کہ  تجاوزات کے حوالے سے آپریشن جاری ہے،محمود آبادنالے پر آپریشن 100فیصد مکمل ہو چکا ہے جس کے فوائد بھی سامنے آرہے ہیں کہ بارش کا پانی اب یہاں کھڑا نہیں ہوتا۔ کراچی کے نالوں سے 11 لاکھ ٹن کوڑا نکالنا ہے۔ کراچی میں 55 سے 60 کلو میٹر سڑکیں بنائی جائیں گی۔ اسد عمر نے مزید کہا کہ پی ٹی آئی  سندھ کے عوام کے مسائل  کوسمجھ سکتی ہے۔ کراچی کو ترسایا جاتا ہے گلی سے صفائی نہیں ہوتی۔ وفاق نے کراچی والوں  کےزخموں پر مرہم رکھنے کا فیصلہ کیا ہے۔ اگر میرے حلقے میں پیپلز پارٹی اپنےجھنڈےلگاکر کام کرتی ہےتو میں ویلکم کرتا ہوں۔

انہوں نے کہا کہ وزیرِ اعظم عمران خان 30 ستمبر سے پہلے سرکلر ریلوے کے انفرا اسٹرکچر والے حصے کا سنگِ بنیاد رکھیں گے، سرکلر ٹرین چلانے کے لیے نجی کمپنیز کو دعوت دی جائے گی۔ٓ اسد عمر نے کہا کہ کراچی کے تمام ٹرانسپورٹ منصوبوں کے لیے کنٹرول سینٹر مکمل ہو چکا، اکتوبر 2023ء تک کے فور منصوبے سے پانی کراچی پہنچا دیا جائے گا۔