پاکستان سے برطانیہ جانے والوں کیلئے خوشخبری آگئی

جی این این کے مطابق اس حوالےسے برطانوی میڈیا کا کہنا ہے کہ برطانیہ اسی ہفتے پاکستان کو ریڈلسٹ سے نکال سکتا ہے ۔ برطانوی میڈیا کے مطابق پاکستان سمیت 24ممالک کو ’’گرین لسٹ‘‘ میں شامل کئے جانے کا امکان ہے اور برطانوی حکومت کی جانب سے  جمعرات کو اعلان  متوقع ہے ۔

یاد رہے پاکستان میں کورونا کی تیسری لہر کے پیش نظر برطانوی حکومت نے پاکستان سمیت چار ممالک پر 9 اپریل سے سفری پابندیاں عائد کرنے کا اعلان کیا تھا۔ برطانوی حکومت کا کہنا ہے کہ ان چار ممالک کو انگلینڈ کی ’ریڈ لسٹ‘ میں شامل کیا جا رہا ہے تاکہ ملک کو کورونا وائرس کی نئی اقسام سے بچایا جا سکے۔

ریڈ لسٹ میں شامل ملکوں سے آنے والے مسافروں کو برطانیہ پہنچنے پر مشکلات کا سامنا  ہے ۔ ان  قواعد کے تحت صرف ان پاکستانیوں کو ہی برطانیہ میں داخلے کی اجازت ملے گی جن کے پاس برطانیہ کی شہریت یا وہاں کا ریزیڈنسی ویزا ہے اور ان کا کورونا ٹیسٹ منفی آیا ہے۔ ان افراد کو برطانیہ پہنچنے پر 10 دن کے لیے اپنے خرچ پر لازمی قرنطینہ میں بھی رہنا ہو گا۔ خلاف ورزی کی صورت میں انھیں دس ہزار پاؤنڈ جرمانے یا 10 سال تک قید کا سامنا کرنا پڑ سکتا ہے۔ اس پابندی سے پاکستان سے واپس جانے والوں کو مہنگے ٹکٹ خریدنے، کورونا ٹیسٹوں کی فیس کے علاوہ  10 روز قرنطینہ کا خرچہ بھی برداشت کرنا پڑتا ہے ۔

یاد رہے کہ برطانیہ نے ایک ماہ قبل بحرین، قطر، یو اے ای اور بھارت کو اپنی کورونا ریڈ لسٹ سے نکال دیا تھا جبکہ پاکستان بدستور شامل رکھا تھاجس کے بعد پاکستان کی جانب سے اس معاملے  پر تحفظات کا اظہار کیا گیا تھا۔