وزیراعظم آج جنرل اسمبلی اجلاس سے خطاب کریں گے

تفصیلات کے مطابق وزیراعظم عمران خان کا جنرل اسمبلی سے ورچوئل خطاب کلیدی نوعیت اوراہم پالیسی بیان ہوگا ، وہ  اپنے خطاب میں مقبوضہ کشمیر میں بھارتی مظالم اور افغانستان کی صورتحال پر پاکستان کے مؤقف سے دنیا کو آگاہ کریں گے۔وزیراعظم کی تقریر میں افغانستان میں انسانی المیہ اور اقتصادی بحران سے بھی خبردار کیا جائے گا جبکہ وزیراعظم بھارت کی ریاستی دہشتگردی،کشمیر میں انسانیت سوز مظالم پر جاری کردہ ڈوزیئر کا بھی ذکرکریں گے۔ 

وزیراعظم اقوام متحدہ کی قراردادوں میں کشمیر، فلسطین سمیت تمام مسائل پر کیے وعدے پورے کرنے پرزور دیں گے۔وزیراعظم بین الاقوامی دنیا پر افغانستان میں مشترکہ، متفقہ حکومت کےقیام میں مدد کی بات کریں گے  جبکہ افغانستان سے دہشتگردی، مہاجرین کی آمد اور دیگرخدشات کا بھی ذکر کیا جائے گا۔ اجلاس میں  وزیراعظم کورونا وباء کے خاتمے، ویکسین سب کے لیے کی حکمت عملی اپنانے کی تجویز دہرائیں گے۔