وزیراعظم عمران خان ، پاک ترک اعلیٰ سطح سٹریٹجک کونسل کے ساتویں اجلاس کےمنتظر ہیں ،شاہ محمود قریشی

نیویارک : وزیر خارجہ شاہ محمود قریشی نے ترک اور سعودی ہم منصب سے ملاقاتیں کی ہیں جن میں باہمی دلچسپی کے امور پر تبادلہ خیال کیا گیا ہے ۔ 

وزیرخارجہ شاہ محمود قریشی نے نیویارک میں اقوام متحدہ کی جنرل اسمبلی کے 76 ویں اجلاس کی سائیڈ لائنز پر سعودی اور ترک وزرائے خارجہ سے ملاقاتیں کیں جس میں انہوں نے عالمی برادری سے افغان شہریوں کی معاونت کے لیے اقدام کی اپیل کی ۔ 

وزیرخارجہ نے سعودی ہم منصب شہزادہ فیصل بن فرحان کو مقبوضہ کشمیر میں بھارتی قابض افواج کی جانب سےنہتے کشمیریوں پر ڈھائے جانے والے مظالم اور انسانی حقوق کی سنگین خلاف ورزیوں سے آگاہ کیا ۔ 

ترک وزیر خارجہ سے ملاقات میں شاہ محمود کا کہنا تھا کہ وزیراعظم عمران خان ، پاک ترک اعلیٰ سطح سٹریٹجک کونسل کے ترکی میں منعقد ہونے والے ساتویں اجلاس کے منتظر ہیں ۔