شہروزکاشف نےدنیا کی آٹھویں بلند ترین چوٹی مناسلو سرکرلی

پاکستانی کوہ پیما شہروز کاشف  کے ٹو سر کرنے والے دنیا کے کم عمر ترین جبکہ ماونٹ ایورسٹ سر کرنے والے پاکستان کے کم عمر ترین کوہ پیما ہیں، اور اب ایک بار پھر انہوں نے نیپال میں 8 ہزار میٹر سے زائد بلند ایک اور چوٹی  ' مناسلو'  سر کر کے تاریخ رقم کردی۔ شہروز  نے آج  صبح پانچ بج کر 40 منٹ پر  8 ہزار 163 میٹر بلند ’مناسلو‘ چوٹی کو سر کیا ہے جو شہروز کاشف کے کیریئر کی چوتھی چوٹی ہے۔شہروز کاشف نے پانچ ماہ کے اندر مسلسل تیسری ایسی چوٹی سر کی ہے جس کی بلندی آٹھ ہزار میٹر سے زیادہ ہے جوکہ اس عمر میں  ایک انوکھا ریکارڈ ہے۔ شہروز کے فیس بُک پیج پر ان کی مہم جوئی کی لائیو اپڈیٹس بھی شیئر کی جارہی ہیں۔

مناسلو چوٹی  نیپال میں سلسلہ کوہ ہمالیہ میں واقع ہے، مناسلو کا مطلب سنسکرت میں روح کا پہاڑ ہے۔ اور اس چوٹی کو سب سے پہلے 9 مئی 1956  میں  دو جاپانی کوہ پیماؤں نے سر کیا تھا ۔ 

خیال  رہے کہ لاہور سے تعلق رکھنے والے شہروز کاشف نے  17 برس کی عمر میں پاکستان کی چوتھی بلند ترین چوٹی براڈ پیک سَر کرنے کا اعزازبھی اپنے نام کر رکھا ہے ۔