پی سی بی نے سی ای او وسیم خان کا استعفی منظور کرلیا

تفصیلات کے مطابق چیئرمین پاکستان کرکٹ بورڈ رمیز راجہ نے کہا ہے کہ وسیم خان نے پی سی بی میں بہتر قیادت کا مظاہرہ کیا، کورونا کے دوران وسیم خان کے بہتر فیصلوں سے عالمی اور قومی کرکٹ سرگرمیاں متاثر  نہیں ہوئیں۔ چیئرمین پی سی بی  نے  وسیم خان کے لیے نیک خواہشات کا اظہار بھی کیا۔

وسیم خان نے کہا ہے کہ پاکستان کرکٹ بورڈ سے وابستگی پر فخر ہے، ملک میں ٹیسٹ کرکٹ کی بحالی اور  پی ایس ایل کے انعقاد پر مطمئن  ہوں۔ میرے لیے آگے بڑھنے اور اپنی فیملی سے دوبارہ ملنے کا یہی بہترین وقت ہے، چیئرمین پی سی بی رمیز راجہ  کیلئے  نیک تمناؤں کا اظہار کرتا ہوں۔

واضح رہےکہ فروری 2019 میں وسیم خان نے مینجنگ ڈائریکٹر پی سی بی کا  عہدہ سنبھالا تھا ۔ وسیم خان کے پی سی بی کے  ساتھ طے پانے والے معاہدے کی مدت  فروری 2022 میں  ختم ہونی  تھی۔

وسیم احمد خان 1995سے 2001 تک  واروکشائر، سیسیکس اور ڈربی شائر کی طرف سے کاؤئنٹی کرکٹ کھیل چکے ہیں۔ وسیم خان انگلینڈ، آسٹریلیا اور نیوزی لینڈ میں بھی فرسٹ کلاس کرکٹ کھیل چکے ہیں ۔  وہ دنیا کے 10 بہترین بزنس اسکولوں میں سے ایک ’واروک بزنس اسکول سے ایم بی اے کی ڈگری حاصل کرچکے ہیں اور خود انگلینڈ میں کاؤنٹی کرکٹ کھیلنے کا تجربہ بھی رکھتے ہیں۔ 

وسیم خان نے 58 فرسٹ کلاس میچوں میں 5 سنچریوں اور 17 نصف سنچریوں کی مدد سے 2 ہزار 835 رنز بنائے جس میں ان کا زیادہ سے زیادہ اسکور 181 رنز تھا۔

انہیں 2013 میں انگلش کرکٹ میں اعلیٰ خدمات پر ملکہ برطانیہ کی جانب سے ایم بی ای ایوارڈ (آرڈر آف برٹش ایمپائر) سے نوازا گیا تھا اور اس کے 2 سال بعد انہیں لیسٹر شائر کاؤنٹی کرکٹ کلب کی جانب سے چیف ایگزیکٹو مقرر کیا گیا اور وہ انہوں نے وہاں ایک کامیاب دور گزارا۔

2005 میں انہیں 50 ملین ڈالر لاگت کے کمیونٹی ڈویلپمنٹ منصوبے کی قیادت سونپی گئی جسے انگلینڈ اینڈ ویلز کے 11ہزار اسکولوں کے 25 لاکھ بچوں کے لیے کام کرنا تھا۔ وہ اسپورٹس انگلینڈ کے بورڈ میں بھی شامل ہیں جو برطانیہ کے 55 کھیلوں کے لیے پالیسی سازی کرتا ہے جبکہ اس کے ساتھ ساتھ وہ پرنس ٹرسٹ کرکٹ گروپ کا بھی حصہ رہ چکے ہیں۔

وسیم خان نے 7 سال تک انگلش کرکٹ بورڈ کے انسداد کرپشن اور انٹیگریٹی یونٹ کے لیے بھی خدمات انجام دیں اور حال ہی میں انہیں انگلش کرکٹ بورڈ نے ایک ورکنگ گروپ کی ذمے داری سونپی تھی جسے 2020 کے بعد ڈومیسٹک کرکٹ کی بہتری کے لیے تجاویز مرتب کرنی تھیں۔اس کے علاوہ وسیم خان کی کتاب کو 2006 میں وزڈن نے سال کی بہترین کتاب قرار دیا تھا۔