ڈی ایم اے سندھ نے آج رات سے ہونے والی بارشوں کا الرٹ جاری کر دیا

تفصیلات کے مطابق ڈیزاسٹر مینجمنٹ اتھارٹی سندھ کا کہنا ہے کہ  طاقتور مون سون سسٹم سندھ میں داخل ہو چکا ہے،آج سے کراچی سمیت ضلع تھرپارکر ،بدین ،ٹھٹھہ ،عمرکوٹ ،میرپورخاص  میں گرج چمک کے ساتھ تیز بارش کا امکان ہے ۔

 ڈیزاسٹر مینجمنٹ اتھارٹی سندھ کا کہنا تھا کہ  بارشوں کا سلسلہ 2 اکتوبر تک وقفے وقفے سے جاری رہے گا،اس دوران تیز ہواؤں سے تعمیرات کو نقصان کا خدشہ ہے، تیز بارشوں کے باعث کراچی، حیدرآباد، بدین ،ٹھٹھہ ،میرپورخاص ، ٹنڈو محمد خان، دادو اور ٹنڈو الہیار میں اربن فلڈنگ کا خطرہ ہے۔

 ڈیزاسٹر مینجمنٹ اتھارٹی نے مزید کہا ہے کہ  تمام بلدیاتی ادارے اور ضلعی انتظامیہ 3 اکتوبر تک الرٹ رہیں ۔

گزشتہ ہفتے  کراچی  کے مختلف علاقوں  کارساز ، ایئر پورٹ ، نیپا چورنگی پر  بارش   ہوئی تھی جس کے باعث شہر میں 77 فیڈر بند  ہوگئے تھے،   19 فیڈر ٹرپ ، دیگر کو حفاظتی اقدامات کے پیش نظر بند کیا گیا تھا۔ شہر میں بارش کے باعث مختلف مقامات پر ٹریفک کا دباو بڑھ گیا  تھا،  مختلف مقامات پر پانی کی وجہ سے ٹریفک جام اور سڑکوں پر دباو تھا، بارش سے  کے ڈی اے چورنگی کی مرکزی شاہراہ دھنس گئی تھی ،  کراچی یونیوسٹی کی بس سڑک کے گڑھوں میں پھنس گئی تھی۔