حکومت نے پٹرول اور ہائی سپیڈ ڈیزل پر سیلز ٹیکس میں کمی کردی

ذرائع کے مطابق پٹرول کے فی لیٹر پر سیلز ٹیکس میں 3 روپے 61 پیسے کی کمی کے بعد پیٹرول پر سیلز ٹیکس11 روپے 76 پیسے سے کم کرکے 8 روپے 15 پیسے فی لیٹر مقررکردیا گیا ہے، ہائی اسپیڈ ڈیزل پر سیلز ٹیکس ایک روپے 10 پیسے فی لیٹر کمی  کے بعد 12 روپے 52 پیسے سے کم کر کے 11 روپے 42 پیسے لیٹر مقرر کیا گیا ہے۔

ذرائع کے مطابق حکومت نے پٹرول اور ہائی سپیڈ ڈیزل پر لیوی میں کوئی ردوبدل نہیں کیا، پٹرول پر لیوی 5 روپے 62 پیسے فی لیٹر اور ہائی اسپیڈ ڈیزل پر پٹرولیم لیوی 5 روپے 14 پیسے فی لیٹر برقرار ہے، سیلز ٹیکس کی نئی شرح کا اطلاق 15 اکتوبر تک ہوگا۔

خیال رہے کہ گزشتہ روز وزارت خزانہ نے پٹرولیم مصنوعات کی قیمتوں میں اضافہ  کیا ہے ، پٹرول کی فی لٹرقیمت میں 4 روپے کااضافہ ہوگیا ہے جبکہ ہائی اسپیڈ ڈیزل کی قیمت میں 2 روپے فی لٹرکا اضافہ کردیا گیا ہے۔  مٹی کے تیل کی فی لٹرقیمت میں 7 روپے 5پیسے کااضافہ کردیا گیا ہے۔ پیٹرولیم مصنوعات کی قیمتوں میں اضافے کے بعد پیٹرول کی نئی قیمت 127.30 روپے فی لیٹر ہوگئی ہے جب کہ ہائی اسپیڈ ڈیزل 122.4، مٹی کا تیل 99.31 اور لائٹ ڈیزل 99.51 روپے فی لیٹر ہوگیا۔

یاد رہے کہ حکومت کی جانب سے 15 ستمبر کو پٹرولیم مصنوعات کی قیمتوں میں اضافہ کیا گیا تھا پیٹرول کی قیمت میں 5 روپے فی لیٹر جبکہ ڈیزل کی قیمت میں 5 روپے ایک پیسہ فی لیٹر اضافہ کیا گیا تھا۔