نیشنل ٹی ٹوئنٹی کپ: بلوچستان نے جنوبی پنجاب کو آٹھ وکٹوں سے ہرا دیا

تفصیلات کے مطابق نیشنل ٹی ٹوئنٹی کپ کے 13ویں مقابلے میں بلوچستان نے ٹاس جیت کر فیلڈنگ کا فیصلہ کیا۔جنوبی پنجاب کی ٹیم اچھا آغاز نہ کر سکی،  پہلی دو وکٹیں ابتدائی دو اوورز میں ہی گر گئیں۔

تیسرے اوور میں بلوچستان ٹیم کو بڑا جھٹکا لگا،، کپتان امام الحق فیلڈنگ کرتے ہوئے زخمی ہو گئے،انہیں سٹریچر کے ذریعے گراؤنڈ سے باہر لایا گیا۔دو وکٹیں جلد گرنے کے بعد جنوبی پنجاب کے صہیب مقصود نے بیٹنگ لائن کو سہارا دیا،انہوں نے شاندار نصف سنچری سکور کی۔خوشدل شاہ 25 رنز اور اعظم خان 2 رنز بنا کر آؤٹ ہوئے،جنوبی پنجاب کی ٹیم 20 اوورز میں 9 وکٹوں پر ایک سو چوہتر رنز بنا سکی۔

ہدف کے تعاقب میں بلوچستان کے اوپنر عبداللہ شفیق اور عبدال بنگلزئی نے بہترین آغاز کیا،دونوں کے درمیان چوراسی رنز کی شراکت بنی،عبد اللہ شفیق چوالیس رنز اور عبدال بنگلزئی پچاس رنز بنا کر آؤٹ ہوئے، حارث سہیل سینتالیس رنز اور سہیل اختر سولہ رنز بنا کر ناٹ آؤٹ رہے۔بلوچستان نے انیس ویں اوور میں صرف دو وکٹیں گنوا کر ایک سو پچھتر رنز کا ٹارگٹ پورا کر لیا۔

خیال رہے کہ گزشتہ روز نیشنل  ٹی ٹوئنٹی میں ناردن نے سینٹرل پنجاب کو 6 وکٹ سے شکست دی تھی ۔ بابر اعظم نے 63 گیندوں پر 105 رنز کی ناقابل شکست اننگز کھیلی۔ تاہم ناردن نے 201 رنز کا ہدف دو گیندوں قبل حاصل کرلیا۔ بابر اعظم کے ٹی ٹوئنٹی کیریئر کی چھٹی سنچری تھی جس کے ساتھ وہ ٹی ٹوئنٹی میچز میں سب سے زیادہ سنچری بنانے والے پاکستانی بن گئےہیں ۔

واضح رہے کہ پنڈی کرکٹ اسٹیڈیم میں نیشنل ٹی ٹوئنٹی کپ 3 اکتوبر تک کھیلا جائے گا، 6 اکتوبر سے نیشنل ٹی ٹوئنٹی کپ کی میزبانی قذافی سٹیڈیم لاہور کرے گا۔