یوسف رضا گیلانی کی شہباز شریف سے اہم ملاقات

تفصیلات کے مطابق سابق وزیر اعظم یوسف رضا گیلانی لاہور کی احتساب عدالت پہنچے جہاں انہوں نے  اپوزیشن لیڈر میاں شہباز شریف سے  ملاقات کی۔ اس موقع پر رہنما پیپلز پارٹی یوسف رضا گیلانی نے سینیٹ انتخابات سے متعلق شہباز شریف سے مشاورت بھی کی۔ ملاقات کے دوران سینیٹ الیکشن اور حلقہ این اے 75 کے ضمنی انتخاب پر بات چیت کی گئی۔ یوسف رضا گیلانی نے شہباز شریف کو آصف زرداری اور بلاول بھٹو زرداری کا پیغام پہنچایا۔ یوسف رضا گیلانی نے شہباز شریف کو سینیٹ الیکشن کی حکمت عملی سے آگاہ کیا۔

احتساب عدالت کے باہر سابق وزیر اعظم  یوسف رضا گیلانی  نے میڈیا سے گفتگو کرتے ہوئے کہا کہ  پارلیمنٹ کی بالادستی کیلئے  اپوزیشن لیڈر  سےملاقات کی،نون لیگ کی حمایت پر ان کا مشکور ہوں۔   اختر مینگل اور فضل الرحمان سے بھی ملاقات ہوئی، ہم نے ماضی بھول کر آگے بڑھنے کی بات کی، میثاق جمہوریت کیلئے ماضی میں بھی اکھٹے ہوئے تھے آج بھی ساتھ ہیں ۔ ان کاکہنا تھا کہ    پی ڈی ایم ایک حقیقت ہے، ضمنی انتخابات میں پاکستان ڈیمو کریٹک موومنٹ جماعتوں کی کامیابی جمہوریت کی کامیابی ہے۔   ہارس ٹریڈنگ کی مذمت کرتے ہیں، حکومت نے میری نا اہلی  کیلئے کوششیں کیں،آرڈیننس کے ذریعے جو ترمیم کر رہے ہیں وہ سب کے سامنے ہے۔

واضح رہے کہ سینیٹ انتخابات کے سلسلے میں یوسف رضاگیلانی لاہور میں موجود ہیں ،  دوسری جانب    لاہور کی احتساب عدالت میں رمضان شوگر ملز کیس کی سماعت کے سلسلے میں آج میاں شہباز شریف کو پیش کیا گیا۔