Advertisement
پاکستان

نئے ڈی جی آئی ایس آئی کی تقرری پر مشاورت کا عمل مکمل ہو چکا : فواد چوہدری 

اسلام آباد : وفاقی وزیر اطلاعات ونشریات  فواد چوہدری کا کہنا ہے کہ وزیر اعظم اور آرمی چیف کے درمیان نئے ڈی جی آئی ایس آئی کی تقرری پر مشاورت کا عمل مکمل ہو چکا ہے اور نئی تقرری کا پراسس شروع ہو چکا ہے۔

GNN Web Desk
شائع شدہ 5 سال قبل پر اکتوبر 13 2021، 4:08 شام
ویب ڈیسک کے ذریعے
نئے ڈی جی آئی ایس آئی کی تقرری پر مشاورت کا عمل مکمل ہو چکا : فواد چوہدری 

تفصیلات کے مطابق سماجی رابطے کی ویب سائٹ ٹوئٹر پر ایک  بیان میں وفاقی وزیر اطلاعات فواد چوہدری  کاکہنا ہے کہ ایک بار پھر سول اور فوجی قیادت نے یہ ثابت کیا ہے کہ ملک کے استحکام، سالمیت اور ترقی کیلئے تمام ادارے متحد اور یکساں ہیں۔

واضح رہے کہ گزشتہ روز وزیر اطلاعات فواد چوہدری نے وفاقی کابینہ کے اجلاس کے بعد میڈیا کو بریفنگ دیتے ہوئے بتایا تھا کہ پاکستان کی سول اور ملٹری قیادت کے درمیان بہت آئیڈیل تعلقات ہیں اور نئے ڈی جی آئی ایس آئی کا تقرر وزیراعظم کا اختیار ہے جس کے لیے قانونی طریقہ کار اختیار کیا جائے گا۔

فواد چوہدری نے میڈیا کو بتایا تھا کہ وزیراعظم نے ڈی جی آئی ایس آئی کی تقرری کے حوالے سے کابینہ کو اعتماد میں لیا جبکہ وزیراعظم اور آرمی چیف قمر جاوید باجوہ کے درمیان طویل ملاقات بھی ہوئی ہے۔

انہوں نے کہاکہ آرمی چیف اور وزیراعظم کے آپس میں بہت قریبی اور خوشگوار تعلقات ہیں، بہت لوگوں کی خواہش ہوگی مگر وزیر اعظم آفس کبھی بھی کوئی ایسا قدم نہیں اٹھائے گا جس سے پاکستان کی فوج یا پاکستان کے سپہ سالار کی عزت میں کمی ہو اور پاکستان کی فوج یا سپہ سالار بھی کوئی ایسا قدم نہیں اٹھائیں گے جس سے وزیر اعظم یا سول سیٹ اپ کی عزت میں کمی ہو۔

انہوں نے کہا کہ تقرر ہمیشہ وسیع البنیاد مشاورت کی بنیاد پر ہوتا ہے اور ڈی جی آئی ایس آئی کا تقرر قانونی طور پر تمام چیزیں مکمل کرنے کے بعد ہو گا۔

 

Advertisement
رجحانات
Advertisement