لاہور ائیرپورٹ پر غیر ملکی کارگو طیارہ حادثے سے بال بال بچ گیا

تفصیلات کے مطابق لاہور ائیرپورٹ پر غیر ملکی کارگو طیارہ حادثے سے بال بال بچ گیا ہے، ٹیک آف کے دوران رن وے پر طیارے کے تین ٹائر پھٹ گئے تھے، کپتان نے ایمرجنسی بریک لگا کر طیارے کو رن وے پر روک لیا ،  کارگو طیارہ لاہور سے بحرین جارہا تھا ۔

کنٹرول  ٹاور نے ائیرپورٹ رن وے  بند ہونے پر دیگر پروازوں کو بھی روک لیاہے،  طیارے کے ٹائر پھٹتے ہی ریسکیو گاڑیاں رن وے  پر پہنچ گئیں ۔

ذرائع کا کہنا ہے کہ  کارگو پرواز 512 کو لاہور سے بحرین روانہ ہونا تھا، ڈی ایچ ایل کے کارگو جہاز کو حج ٹرمینل کے سامنے پارک کیا جارہا ہے،  رن وے  بند ہوجانے پر ایئربلیو کی کراچی سے آنے والی پرواز 406 اسلام آباد موڑ دی گئی،  پی آئی اے کی لاہورسےکراچی جانے والی پرواز 305 کی روانگی بھی روک دی گئی، جبکہ رن وے بند ہونے سے مزید پروازوں کا شیڈول متاثر ہونے کا خدشہ ہے۔