ضمنی الیکشن ن لیگ نے جیتا ہوا ہے: شاہد خاقان عباسی

اسلام آباد: سابق وزیر اعظم شاہد خاقان عباسی نے کہا ہے کہ آج سوال ری پولنگ کا نہیں الیکشن ن لیگ نے جیتا ہوا ہے، اگر مقابلہ کرنا ہے تو پورے حلقے میں ری پولنگ کروائیں۔

میڈیا سے گفتگو کرتےہوئے شاہد خاقان عباسی نے کہا کہ آپ دوبارہ انتخاب بھی کرائیں گے تو مسلم لیگ ن کی ہی جیت ہوگی۔انہوں نے کہا کہ ووٹ عوام کی امانت ہے جس کا تقدس پامال کیا گیا، وزیراعظم عمران خان اور ان کے وزرا کا احتساب کون کرے گا؟انہوں نے کہا کہ انصاف کے نظام پر آج سوالیہ نشان ہے، 20 پولنگ اسٹیشنزکے پریذائیڈنگ افسر ووٹوں سمیت غائب ہو گئے، الیکشن چوری ہوا، تحقیقات کی ضرورت ہے۔

ن لیگی رہنما کا کہنا تھا کہ کمیشن اس لیے بنتے ہیں کہ مجرموں کی چوری پر پردہ ڈالا جائے، براڈ شیٹ کیس سے متعلق بھی کمیشن بن گیا ہے۔شاہد خاقان عباسی نے کہا کہ احتساب کا ادارہ آج خود قابل احتساب ہے، الیکشن چوری کا کھرا وزیراعظم تک جاتا ہے۔سابق وزیر اعظم کا مزید کہنا تھا کہ الیکٹورل ریفارم کے بجائے آئین اور قانون کے احترام کی ضرورت ہے۔ کارروائی ضروری ہے تاکہ آئندہ ایسی ہمت کوئی نا کرسکے، یہ چھوٹی موٹی بات نہیں آئین کی خلاف ورزی ہے۔