یوسف رضا گیلانی پراعتماد کیلئے شریف برادران کا مشکور ہوں: بلاول بھٹو

جاتی امراء میں مسلم لیگ ن کی نائب صدر مریم نواز سے ملاقات کے بعد مشترکہ پریس کانفرنس کرتے ہوئے پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ ضمنی انتخابات نے ثابت کردیاکہ عوام پاکستان ڈیموکریٹک موومنٹ (پی ڈی ایم) کے ساتھ ہیں۔ بلاول بھٹو نے کہا کہ گیلانی کی جیت سے ثابت ہوگا عوام اور پارلیمان پی ڈی ایم کے ساتھ ہیں۔ان کا کہنا تھا کہ خورشید شاہ اور شہباز شریف جیل میں ہیں، ہم مطالبہ کرتے ہیں خورشید شاہ اور شہباز شریف کو رہا کیا جائے۔انہوں نے کہا کہ یوسف رضا گیلانی کی کمپین بہت اچھی چل رہی ہے، کٹھ پتلی حکومتی ممبران کو بھی پی ڈی ایم نے عزت دلائی ہے۔

پی پی پی کے چیئرمین نے کہا کہ ہر ادارہ اپنا آئینی و جمہوری کردار اپنائے، ملک کو تاریخی غربت میں دھکیل دیا ہے، نااہل حکمران ملک کے لیے بوجھ بنا ہوا ہے۔بلاول بھٹو کا کہنا تھا کہ حکومت کو سینیٹ میں چیلنج کریں گے، لانگ مارچ کریں گے یہ فیصلہ کریں گے اس حکومت کو کس طرح ہٹانا ہے، جائز حکومتوں کو اپنی مدت پوری کرنی چاہیے۔انہوں نے کہا کہ ناراض اتحادیوں کو زبردستی باندھا گیا ہے، اس وقت سلیکٹڈ نظام کا مقابلہ کررہے ہیں، جو مسلط کیا گیا ہے، پرامن احتجاج جمہوری حق ہے۔