کالعدم جماعت کا احتجاج ، ریاست پاکستان کا آہنی ہاتھوں سےنمٹنے کافیصلہ

ذرائع کے مطابق  کالعدم جماعت کی مذہبی لبادے میں سیاسی عزائم پورے کرنے کی کوشش کو ناکام بنانے کے لیے ریاست پاکستان نے آہنی ہاتھوں سےنمٹنے  کافیصلہ کرلیا ۔ حکومت اور سکیورٹی ادارے کالعدم تنظیم سے سختی سے نمٹنے کےلیےایک پیج پرآگئے ہیں

ذرائع کاکہنا ہے کہ  لانگ مارچ کسی بھی صورت نہیں ہونے دیا جائے گا  اور کالعدم تنظیم سے مذاکرات بھی نہیں کیے جائیں گے۔

ذرائع کے مطابق سیاسی مقاصد پورا کرنے کے لیے تشدد کا راستہ نہیں اپنانے دیا جائے گا۔ اس حوالے سے راولپنڈی اور اسلام آباد میں پولیس کو ہائی الرٹ کر دیا گیا ہے۔

حکومت کی جانب سے کالعدم تنظیم کے احتجاج سے نمٹنے کی تیاری کر لی گئی۔ 

مری روڈ اور ملحقہ علاقوں میں تعینات پولیس اہلکاروں میں آنسو گیس گنز اور شیل تقسیم کر دیئے گئے۔میٹرو اسٹیشن اور ٹریک پر موجود اہلکاروں کو بھی آنسو گیس شیل پہنچا دیئے گئے ہیں۔

خیال رہے کالعدم تنظیم کے اسلام آباد کی جانب لانگ مارچ اور شرکاء کو روکنے کے لیے پولیس کی شیلنگ جاری ہے، جگہ جگہ رکاوٹیں اور جہلم کے تینوں پلوں کی حفاظتی دیواریں توڑ کر کنٹینر رکھ دئیے گئے ہیں۔

واضح رہے کہ ٹی ایل پی نے 12 ربیع الاول کو لاہور میں احتجاج کے تازہ ترین دور کا آغاز کیا تھا جو بنیادی طور پر اس کے سربراہ مرحوم بانی خادم رضوی کے بیٹے حافظ سعد حسین رضوی کی رہائی کے لیے پنجاب حکومت پر دباؤ ڈالنے کے لیے تھا ۔ 

بعد ازاں ٹی ایل پی نے اسلام آباد کی طرف مارچ کرنے کا اعلان کرتے ہوئے حکومت کو دارالحکومت جانے والے راستوں کو بلاک کرنے کا اشارہ دیا۔

لانگ مارچ کسی بھی صورت نہیں ہونے دیں گے، کالعدم جماعت کی مذہبی لبادے میں سیاسی عزائم پورے کرنے کی کوشش، ذرائع pic.twitter.com/Kk3FDDrT3c

— GNN (@gnnhdofficial) October 27, 2021