بھارت پاکستان کو بلیک لسٹ میں شامل کروانے میں ناکام رہا: شاہ محمود قریشی

وزیر خارجہ شاہ محمود قریشی نے ایف اے ٹی ایف اعلامیہ پر اپنا ردعمل دیتے ہوئے کہاکہ ہم نے قانون سازی سمیت اس حوالے سے بھرپور کاوشیں کیں ،ہماری کاوشیں اس بات کی غمازی کر رہی ہیں کہ کہ پاکستان ٹیررفنانسنگ اورمنی لانڈرنگ کےخلاف سنجیدہ ہے ، وہ خود اس بات کے معترف ہیں کہ پاکستان نے27میں سے24پوائنٹس پر مکمل عملدرآمد کرلیاہے۔ شاہ محمود قریشی نے کہا کہ رواں سال جون تک ہم انشااللہ بقیہ 3پوائنٹس پر بھی عملدرآمد کر لیں گے،پاکستان نے یہ اقدامات صرف ایف اے ٹی ایف کیلئے نہیں بلکہ اپنے قومی مقاصد میں کیے ہیں ، ہم نے دہشت گردی کے خلاف جنگ میں بھاری قیمت چکائی ۔ وزیر خارجہ نے کہا کہ بھارت، ایف اے ٹی ایف کو سیاسی مقاصد کیلئے استعمال کرتا ہے ، اور بھارت کو ایک مرتبہ پھر ناکامی ہوئی ، ایف اے ٹی ایف اجلاس میں 13 ممالک نے پاکستان کے اقدامات کو سراہا۔ 

سیز فائرمعاہدے سے متعلق شاہ محمود قریشی نے کہا کہ ڈی جی ایم او کارابطہ اور سیز فائرمعاہدے کی پاسداری پرآمادگی مثبت قدم ہے ، بھارت کی جانب سے سیز فائر معاہدے کی خلاف ورزیاں کی جاتی رہیں 2008 کے بعد ان کی شرح میں اضافہ ہوا ، بھارت کی جانب سے سیزفائر معاہدےکی خلاف ورزی سے لاین آف کنٹرول پر بسنے والے معصوم کشمیری بری طرح متاثرہوئے ، بھارت کی جانب سےاندھادھندفائرنگ کی جاتی رہی ۔ ان کا کہنا تھا کہ یہ پیشرفت خوش آئندہ ہے،اس سے لوگوں کوتحفظ ملےگا،بھارت مسئلہ کشمیر کے حوالے سے اقوام متحدہ سلامتی کونسل کی قراردادوں سے انکار نہیں کر سکتا - وہ ریکارڈ کا حصہ ہیں ، موجودہ بھارت سرکار نے کشمیریوں پر مظالم کی انتہا کردی مگر انہیں اپنے مقاصد کے حصول میں ناکامی ہوئی ، پاکستان پہلے دن سےکہہ رہاہے کہ مسائل کے حل کیلئے مذاکرات ہی ممکنہ راستہ ہیں ۔