مہنگائی میں اضافہ  ، مولانا فضل الرحمان نے پی ڈی ایم کاہنگامی اجلاس آج طلب کرلیا

تفصیلات کے مطابق پی ڈی ایم کی جانب سے جاری اعلامیے کے مطابق پی ڈی ایم کااجلاس مولانا فضل الرحمان کی زیر صدارت  آج دوپہر ساڑھے3 بجےہوگا۔  پی ڈی ایم میں شامل جماعتوں کی قیادت ویڈیولنک کےذریعے شرکت کرے گی ۔

اعلامیے کے مطابق  اجلاس میں سابق وزیراعظم نوازشریف، شہبازشریف اورمریم نواز بھی شرکت کریں گے،  محمودخان اچکزئی، سرداراخترمینگل اورآفتاب شیر پاؤ ، شاہدخاقان عباسی ،مولانااویس نورانی سمیت پی ڈی ایم کے دیگر قائدین شرکت کریں گے۔ 

اعلامیے کے مطابق اجلاس میں پارلیمنٹ کے ہونیوالے مشترکہ اجلاس سےمتعلق حکمت عملی پر غور ہوگا جبکہ پٹرولیم مصنوعات کی قیمتوں میں اضافہ ،مہنگائی کیخلاف احتجاجی حکمت عملی پر غور کیاجائیگا۔ 

پی ڈی ایم کیا ہے؟

پاکستان ڈیموکریٹک موومنٹ، 20 ستمبر کو اپوزیشن کی آل پارٹیز کانفرنس کے بعد تشکیل پانے والا 11 سیاسی جماعتوں کا اتحاد ہے ۔ مولانا فضل الرحمن پی ڈی ایم کے پہلے صدر ہیں جبکہ پیپلز پارٹی کے راجا پرویز اشرف سینئر نائب صدر ہیں اور مسلم لیگ (ن) کے شاہد خاقان عباسی اس کے سیکریٹری جنرل ہیں۔

اپوزیشن کی 11 جماعتوں کے اس اتحاد میں بڑی اپوزیشن جماعتوں پاکستان مسلم لیگ (ن)، پاکستان پیپلز پارٹی (پی پی پی)، جمعیت علمائے اسلام (ف) سمیت دیگر جماعتیں شامل ہیں۔

خیال رہے کہ پاکستان ڈیموکریٹک موومنٹ کی حکومت مخالف تحریک کے سلسلے میں جلسوں کا باقاعدہ آغاز 16 اکتوبر2020 کو پنجاب کے شہر گوجرانوالہ سے ہوا تھا، جس کے بعد 18 اکتوبر کو کراچی میں پی ڈی ایم نے اپنی سیاسی طاقت کا مظاہرہ کیا تھا۔