گریٹر اقبال پارک کیس: ٹک ٹاکر عائشہ نے ایف آئی اے کو بیان ریکارڈ کروادیا

تفصیلات کے مطابق متاثرہ خاتون عائشہ نے  فیڈرل انویسٹی گیشن ایجنسی  (ایف آئی اے)  کو بیان ریکارڈ کروادیا ہے۔عائشہ اکرم نے اپنے بیان میں کہا ہے کہ  ریمبو نے منگیتر کے ساتھ بنائی گئی ویڈیو پر بلیک میل کیا، ریمبو نے خان بابا کے ساتھ مل کر بلیک میل کیا۔

عائشہ اکرم نے اپنے بیان میں کہا ہے کہ خان بابا واہ کینٹ ٹیکسلہ کا رہائشی اور انایہ کے نام سے سوشل میڈیا پر پلیٹ فارم بنا رکھا ہے۔ ملزم ریمبو  10 لاکھ روپے بلیک میل کرکے لے چکا ہے۔

ذرائع کے مطابق عائشہ ایف آئی اے بلیک میلنگ سے متعلق کوئی ثبوت فراہم نہ کرسکی،  10 لاکھ سے متعلق بھی کوئی ثبوت تاحال نہیں دیا گیا۔

خیال رہے کہ  عائشہ کی جانب سے 1 ماہ قبل ریمبو کے خلاف درخواست دی گئی تھی۔

واضح رہے کہ لاہور میں مینارِ پاکستان کے گریٹر اقبال پارک میں خاتون ٹک ٹاکر عائشہ اکرم کو ہراسگی اور بدتمیزی کا نشانہ بنانے کا واقعہ 14 اگست کے روز پیش آیا تھا۔یومِ آزادی کے موقع پر خاتون ٹک ٹاکر عائشہ اکرم سے ہوئی دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔سینکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیئے ۔