امریکا نے ویکسین شدہ غیرملکیوں کیلئے اپنی سرحدیں کھول دیں

غیر ملکی خبر رساں ادارے کے مطابق امریکہ نے آٹھ نومبر سے پابندیاں اٹھانے کا اعلان کیا تھا ۔ جس کے بعد آج سے کینیڈا اور میکسیکو سے آنے والے افراد زمینی راستے سے امریکا میں داخل ہوسکیں گے ۔ نئے قوانین کے تحت غیر ملکی مسافروں کو پرواز سے قبل ویکسی نیشن کا ثبوت پیش کرنا ہوگا ،  سفر سے تین دن پہلے کورونا ٹیسٹ کا منفی نتیجہ حاصل کرنا ہو گا ۔ علاوہ ازیں  رابطے کی معلومات متعلقہ حکام کو دینا ہوں گی ، ایسے غیرملکی مسافروں کو قرنطینہ نہیں کرنا پڑے گا۔

کوروناوائرس : امریکا کا عالمی سفری پابندیاں ختم کرنے کا اعلان

 ٹریول ایڈوائزری میں کہا گیا ہے کہ فائزر، موڈرنا، جانسن اینڈ جانسن اور ایسٹرازینکا قابل قبول ویکسینز میں شامل ہیں، اس کے علاوہ دیگر ویکسینز لگوانے والوں کو ملکی حدود میں داخل نہیں ہونے دیا جائے گا۔

خیال رہے کہ امریکی سرحدیں ابتدائی طور پر 20 ماہ قبل 2020 ءکے آغاز میں چین سے آنے والے مسافروں کے لیے بند کر دی گئی تھیں جس کے بعد ان  پابندیوں کو دیگر ممالک تک بڑھا دیا گیا ۔

واضح رہے کہ سابق  امریکی صدر ڈونلڈ ٹرمپ نے کورونا وبا کے پیش نظر 20 مارچ 2020ء سے سفری پابندیاں  لگائی تھی۔ ان سفری پابندیوں پر سب سے زیادہ اعتراض یورپ اور امریکہ کے پڑوسی کینیڈا اور میکسیکو کی جانب سے ہو رہا تھا۔