عدلیہ کا احترام کرتے ہیں، جب بھی بلائیں گےپیش ہوں گا،وزیراعظم

ذرائع کے  وزیراعظم عمران خان کی زیر صدارت اہم اجلاس ہوا، اجلاس میں ڈی جی آئی ایس آئی لیفٹیننٹ جنرل فیض حمید،اٹارنی جنرل شریک ہوئے، اجلاس میں وفاقی وزیر اسد عمر اور قانونی ٹیم  نے  بھی شرکت کی۔

سانحہ اے پی ایس کیس بارے اٹارنی جنرل نے  اجلاس کوبریفنگ دی۔ذرائع کا کہنا ہے کہ  وزیر اعظم عمران خان نے کہا کہ عدالت جانے کا فیصلہ خود کیا،  عدلیہ کا احترام کرتے ہیں، جب بھی بلائیں گےپیش ہوں گا،  عدالت کے ہر حکم کی پاسداری کریں گے، والدین کے دکھ میں برابر کے شریک ہیں۔ وزیراعظم نے سانحہ اے پی ایس بارےعدالتی احکامات پر عمل درآمدیقینی بنانے کاعزم کیا۔

سپریم کورٹ میں وزیراعظم کی طلبی  

خیال رہے کہ گزشتہ ماہ 20 اکتوبر کو ہونے والی سماعت میں اٹارنی جنرل عدالت میں پیش نہیں ہوئے تھے جس پر عدالت عظمیٰ نے والدین کے مطالبے پر اٹارنی جنرل کو آئندہ دو ہفتے بعد ذاتی حیثیت میں پیش ہونے کا حکم دیا تھا۔

عدالت نے سانحہ اے پی ایس کے ذمہ داران کو سزاؤں سے متعلق حکومتی اقدامات کی تفصیل طلب کی تھیں ۔ اس ضمن میں واضح رہے کہ سانحہ اے پی ایس والدین کا مطالبہ تھا کہ بلا تخصیص اس وقت کے اعلیٰ عسکری سیاسی حکام کے خلاف کارروائی عمل میں لائی جائے۔

سانحہ آرمی پبلک سکول 

واضح رہے کہ تقریباً سات سال قبل پشاور کے آرمی پبلک اسکول پر عسکریت پسندوں کے حملے میں کل 147 افراد شہید ہوئے تھے، جن میں سے 132 بچے تھے۔