ٹی ایل پی کے ساتھ ہونے والے معاملات ہفتہ دس دن میں سامنے آجائیں گے: شیخ رشید

تفصیلات کے مطابق اسلام آباد میں میڈیا سے گفتگو کرتے ہوئے شیخ رشید کا کہنا تھا کہ افغانستان کی صورتحال کے اثرات بھی پاکستان پر ہوں گے، پاکستان کی معیشت پہلے ہی مشکل صورتحال کا شکار ہے۔

ان کا کہنا تھا کہ پاکستان کی پولیس پر بھاری ذمہ داریاں ہیں، اسلام آباد پولیس میں ایک ہزار جوانوں کو جلد بھرتی کیا جائے گا، فائل وزارت خزانہ میں ہے، پاکستان میں وزیر کوبھی فائل کے ساتھ چلنا پڑتاہے۔

انہوں نے کہا ہے کہ اسلام آباد کا ماحول اچھا ہونا چاہیے اور یہاں کرائم کم ہونے چاہئیں،پنجاب میں پولیس کے جو لوگ شہید ہوئے انکے گھرجائیں گے، سارے پاکستان کی پولیس پر فخر ہے۔

شیخ رشید نے کہا ہےکہ وہ  الیکٹرانک ووٹنگ مشین کے حامی ہیں، ان کی جماعت عمران خان کے ساتھ کھڑی ہے، پوری حکومت جانتی ہےکہ ان کا ایک ہی مسئلہ مہنگائی ہے، اشیاء کی قیمتوں میں اضافہ ساری دنیا میں ہوا ہے۔

وفاقی وزیر داخلہ کا کہنا تھا کہ اتحادی کہیں نہیں جارہے، مطالبے منوانے کے لئے کچھ نہ کچھ کرناہوتا ہے،تحریک چلانے کا وقت وہ تھا جب فضل الرحمان پہلی دفعہ اسلام آباد آئے تھے۔

ان کا مزید کہنا تھا کہ اپوزیشن والے انتخابی مہم چلارہے ہیں، وزیراعظم عمران خان 5سال پورے کریں گے،شہبازشریف کا نام پہلے ہی ای سی ایل میں شامل ہے۔