سعودی عرب : تین ماہ کے دوران 65 ہزار سے زائد شہریوں کو ملازمتیں فراہم کی گئیں ، سعودی ذرائع

ریاض: سعودی عرب میں تین ماہ کے دوران 65 ہزار سے زائد شہریوں کو ملازمتیں دی گئیں۔

عرب میڈیا کی رپورٹ کے مطابق مملکت کی وزارت افرادی قوت و سماجی بہبود نے بتایا کہ سال رواں کی تیسری سہ ماہی کے دوران 65 ہزار سے زیادہ سعودیوں کو روزگار فراہم کیا گیا۔

وزارت نے کہا کہ مملکت میں انجینئرنگ، کمیونیکیشن، انفارمیشن ٹیکنالوجی، اکاؤنٹنٹ کے پیشوں، قہوہ خانوں اور ریستورانوں کی اسامیوں میں سعودیوں کو نوکریاں ملیں۔

سعودی وزارت افرادی قوت کا کہنا ہے کہ سعودائزیشن کے تحت یہ ہدف حاصل ہوا، انجینئرنگ کے شعبے میں بھی مقامی نوجوانوں کو ملازمتیں دے رہے ہیں، اس حوالے سے اپنا ٹارگٹ بھی پورا کرلیا ہے۔

‘مملکت میں خواتین سمیت 16 ہزار افراد کو انجینیئرنگ کے شعبے میں روزگار فراہم کیا گیا۔’

وزارت افرادی قوت نے مملکت میں سعودائزیشن کے عمل کو تیز کرنے اور سعودیوں کو روزگار کے زیادہ سے زیادہ مواقع فراہم کرنے کے لیے مختلف شعبوں میں غیر ملکی کارکنوں کی جگہ سعودیوں کے تقرر کو لازمی کیا ہے۔