اس وقت ٹی ٹی پی کی اکثریت ہتھیار ڈالنے کو تیار ہے،معید یوسف

مشیر قومی سلامتی ڈاکٹر معید یوسف  نے صحافیوں سے غیر رسمی گفتگو کرتے ہوئے کہا کہ  افغانستان کے معاملہ پر کسی کو اتنی بڑی تبدیلی کا اندازہ نہیں تھا،  انسانی معاملات پر کوئی سیاست نہیں،  موسم سرما میں افغانستان میں بدترین صورتحال پیدا ہوجائے گی، افغانستان میں انسانی بنیادوں پر اعانت کو پابندیوں سے الگ کردیا گیا ہے، افغانستان میں معاشی اعانت اور استعداد کار میں اضافہ اہم ہے۔

معید یوسف نے کہا کہ دنیا مالی اعانت اور طالبان حکومت کو تسلیم کرنے کو تیار نہیں، امریکہ افغان حکومت کا پیسہ غیر منجمند کرنے کو تیار نہیں،  پاکستان پر تنقید کی جارہی ہے کہ آپ افغانستان کے ترجمان بنے ہوئے ہیں،  جس دن افغانستان میں بحران کی شدت  بڑھی، اس دن پاکستان میں مہاجرین آجائیں گے، افغان مہاجرین کے آنے سے پاکستان میں سیکیورٹی صورتحال خراب ہوجائے گی ہمیں ایسا راستہ اختیار کرنا ہوگا کہ افغانستان میں استحکام آجائے۔

مشیر قومی سلامتی کا کہنا تھا کہ  کالعدم ٹی ٹی پی کو پہلے انڈیا مکمل سپورٹ کررہا تھا، اب ان کی سپورٹ نکل گئی ہے، اب ان کی بنیادی لائف لائن نہیں ہے، اس وقت ٹی ٹی پی کی اکثریت ہتھیار ڈالنے کو تیار ہے، ٹی ٹی پی قانون کو مانیں، ہتھیار ڈالیں قومی دھارے میں آئیں، افغانستان میں موجود ٹی ٹی پی کو داعش اور دیگر استعمال کرسکتے ہیں، ٹی ٹی پی کو کوئی ایمنسٹی نہیں دی جارہی، سارا پراسیس وقت لے گا۔

معید یوسف نے کہا کہ ہمیں ایسے معاملات ریاست کی سطح ہر دیکھنا ہوں گے، وزیراعظم نے واضح کردیا کہ پاکستان برائے فروخت نہیں، ہمارے ساتھ بیٹھیں اور بات کریں، اب بیسز ایسے نہیں دی جاسکتیں، امریکہ کے ساتھ اور ہمارا کوئی اختلاف نہیں ہے۔ان کا مزید کہنا تھا کہ  مودی اور ہٹلر میں کوئی فرق نہیں، روز بھارت میں مسلمان مررہے ہیں، مقبوضہ کشمیر میں تاریخ کے سب سے بڑے محاصرے میں بے گناہ کشمیریوں کو مارا جا رہا ہے ۔