آرمی چیف سے اٹلی کے سیکرٹری جنرل ڈیفنس کی جی ایچ کیو میں ملاقات

پاک فوج کے شعبہ تعلقات عامہ (آئی ایس پی آر ) کی جانب سے جاری کردہ بیان کے مطابق  آرمی چیف جنرل قمر جاوید باجوہ سے  اٹلی کے  سیکرٹری جنرل ڈیفنس کی جی ایچ کیو میں ملاقات ہوئی ہے، ملاقات میں باہمی دلچسپی ، علاقائی سیکیورٹی اورافغانستان کی صورتحال پر بات چیت کی گئی، اس کے علاوہ ملاقات میں فوجی تعاون ،تربیتی امور اورانسداد دہشتگردی کے معاملات پر بھی  بات چیت کی گئی۔

اس موقع پر آرمی چیف جنرل قمر جاوید باجوہ کا کہنا تھا کہ  پاکستان عالمی  اورعلاقائی سطح پراٹلی کے کردار کو اہمیت دیتا ہے، پاکستان اٹلی کے ساتھ باہمی تعلقات کو مزید وسعت دینے کا خواہاں ہے، افغانستان میں بڑھتے انسانی بحران پر قابوپانے کےلیے منظم کوششوں کی ضرورت ہے،  افغانستان میں امن کا مطلب پاکستان میں امن ہے۔

ترجمان پاک فوج کے مطابق  اٹلی کے سیکرٹری جنرل نے پاکستانی مسلح افواج کی پیشہ ورانہ مہارتوں کی تعریف کی،  اٹلی کے سیکرٹری جنرل نے مختلف شعبوں میں باہمی تعاون کو مزید وسعت دینے کا عندیہ دیا۔

سیکرٹری جنرل اٹلی نے کہا کہ  افغانستان اورعلاقائی صورتحال میں  پاکستان کا کردار قابل تعریف ہے۔