ڈیلرز ایسوسی ایشن کا ملک بھر میں ہڑتال جاری رکھنے کا اعلان

تفصیلات کے مطابق  ڈیلرز ایسوسی ایشن نے ملک بھر میں ہڑتال جاری رکھنے کا اعلان کردیا، سیکرٹری اطلاعات ایسوسی ایشن نعمان علی بٹ کا کہنا ہے کہ  حکومت کی جانب سے تاحال مذاکرات کیلئے کوئی رابطہ نہیں کیا گیا،حکومت کی زبانی یقین دہانیوں پر مزید بھروسہ مزاق ہوگا،ملک بھر میں پیٹرول پمپس کی بندش مارجن میں اضافے تک جاری رہے گی۔

سیکرٹری اطلاعات ایسوسی ایشن نے کہا کہ  حکومت کی جانب سے سمری ارسال کرنے کا وعدہ 3 نومبر کو کیا گیا تھا،  ایسوسی ایشن کی جانب سے 17 نومبر تک کا حکومت کو وقت دیا گیا۔

نعمان علی بٹ کا کہنا تھا کہ   حکومت پیٹرول پمپس پر تیل کی فراہمی جاری رکھنے کا جھوٹا دعوی کر رہی ہے، ایسوسی ایشن میں شامل تمام پیٹرول پمپس پر تیل کی بندش ہے۔

گزشتہ روز  ترجمان وزارت پٹرولیم کا کہنا تھا کہ  ملک بھر میں تمام پی ایس او، شیل، ٹوٹل اور دیگر کمپنیوں کے اپنے پٹرول پمپ کھلے رہیں گے،  آئل سپلائی میں مستعدی کےلئے ٹینکروں کو روانہ کردیا گیا ہے، آئل سیکٹر کی مختلف تنظیموں نے وزارت کی جانب سے اٹھائے گئے اقدامات پر اظہار اطمینان کیا ہے۔

خیال رہے کہ پٹرولیم ڈیلرز ایسوسی ایشننے مارجن 6 فیصد بڑھوانے کیلئے 25 نومبر سے ہڑتال کا اعلان کررکھا ہے۔ ترجمان کا کہنا تھاکہ 25 نومبر کو کشمیر، گلگت بلتستان سمیت ملک بھر میں تمام پیٹرول پمپس بند رہیں گے۔