جنوبی افریقہ :  کورونا کی نئی قسم کے پھیلاؤ کا انکشاف

تفصیلات کے مطابق سائنسدانوں اور طبی ماہرین نے خبردار کیا ہے کہ نئے ویرینٹ پر ویکسین کا زیادہ اثرنہیں ہورہا۔ غیرملکی میڈیا کے مطابق صورتحال پر غور کے لیے عالمی ادارہ صحت نے ہنگامی اجلاس بلالیا ہے۔

نیشنل انسٹی ٹیوٹ فار کمیونیکیبل ڈیزیز (این آئی سی ڈی) نے کہا کہ  سیکوینسنگ کے بعد ملک میں نئے قسم کےوائرس کے 22 مثبت کیسز ریکارڈ کیے گئے ہیں۔ بوٹسوانا اور ہانگ کانگ میں بھی جنوبی افریقہ سے آنے والے مسافروں میں اس کی تشخیص ہوئی ہے ۔

وزیرصحت  کاکہنا ہے  کہ  کویڈ کی یہ نئی قسم سنگین تشویش کا باعث ہے اور رپورٹ شدہ کیسز میں تیزی سےاضافہ ہوا ہے ۔ حکام نے جنوبی افریقہ میں  دسمبر کے وسط سے چوتھی لہر کے آغاز کی پیش گوئی کی تھی ۔ 

دوسری جانب برطانیہ نے 6 افریقی ممالک کو آج سے ریڈ لسٹ میں شامل کرنے کا اعلان کردیا ہے۔

ساؤتھ افریقہ، نمیبیا، بوٹسوانا، ایسواتینی اور زمبابوے سے آنے والی پروازوں پر عارضی طور پر پابندی بھی عائد کی گئی ہے۔

خیال رہے کہ اس سے قبل جنوبی افریقہ میں 2020 کے آخر میں بیٹا ورژن کو بھی دریافت کیا گیا تھا ۔ کورونا کی اس قسم کے باعث جنوبی افریقہ میں وبا کی دوسری لہر کے دوران کووڈ کے سنگین کیسز کی تعداد پہلی لہر کے مقابلے میں بڑھ گئی تھی۔