وزارت خزانہ کی ملکی معیشت پر ماہانہ اپ ڈیٹ آوٹ لک رپورٹ جاری

تفصیلات کے مطابق وزارت خزانہ نے ملکی معیشت پر ماہانہ اپ ڈیٹ آوٹ لک رپورٹ جاری کردی ہے،وزارت خزانہ کا کہنا ہے کہ  نان ٹیکس آمدنی اور براہ غیر ملکی سرمایہ میں کمی ریکارڈ کی گئی، برآمدات سمیت درآمدات، ایف بی آر محصولات، ترسیلات زر،برآمدات، اور بڑی صنعتوں کی پیداوار میں اضافہ ہوا ہے، رواں مالی سال اب تک ترسیلات زر 11.9 فیصد اضافے سے 10.6 ارب ڈالر ریکارڈکی گئیں،  ملکی برآمدات 32.2فیصد اضافے سے 9.7ارب ڈالر کی سطح تک پہنچ گئیں۔

 ملکی درآمدات 66.3فیصد اضافے سے 23.5ارب ڈالر کی سطح تک پہنچ گئیں ، رواں مالی سال کے پہلے 4 ماہ میں تجارتی خسارہ 13.8 ارب ڈالر تک پہنچ گیا۔کرنٹ اکاؤنٹ خسارے میں 5.1 ارب ڈالر کا اضافہ ریکارڈ کیا گیا، کرنٹ اکاؤنٹ خسارہ جی ڈی پی کا4.7 فیصد ریکارڈ کیا گیا۔

رپورٹ کے مطابق  زرمبادلہ ذخائر 23 نومبر تک 22 ارب 98 کروڑ  ڈالر سے زائد  ہوگئے،  4 ماہ  میں ٹیکس ریونیو 36.8 فیصد اضافے سے 1843ارب روپے رہا ہے۔

وزارت خزانہ کا کہنا ہے کہ  جولائی میں نان ٹیکس آمدنی 27.4 فیصد کمی سے 249ارب رہی ، 4 ماہ میں پی ایس ڈی پی کی مد میں 392.7ارب روپے منظورکئے گئے ہیں۔

رپورٹ میں کہا گیا ہے کہ  3 ستمبر تک  میں مالیاتی خسارہ بڑھ کر 438 ارب روپے کی سطح تک پہنچ گیا ،  زرعی قرضے 6.5 فیصد اضافے سے 381.3ارب روپے کی سطح پررہے ، اکتوبر میں مہنگائی کی ماہانہ شرح 9.2فیصد ریکارڈ کی گئی ،  جولائی تا اکتوبر  مہنگائی کی سالانہ شرح 8.7 فیصد ریکارڈ کی گئی، بڑی صنعتوں کی شرح نمو جولائی تا ستمبر میں 5.2 فیصد اضافہ ہوا ہے۔