’ایران کو جوہری معاہدے کی خلاف ورزی کی قیمت چکانی ہوگی‘

غیر ملکی خبر رساں ادارے کے مطابق  اسرائیل کے وزیر اعظم نفتالی بینیٹ نے عالمی طاقتوں پر زور دیا کہ وہ جوہری معاہدے کی بحالی کیلئے مذاکرات میں ایران کیخلاف سخت رویہ اختیار کریں۔

اسرائیلی وزیر اعظم  نے کہا کہ  میں ویانا میں ایران کے ساتھ مذاکرات کرنے والے ہر ملک پر زور دیتا ہوں کہ ایران پر واضح کر دے کہ وہ ایک ہی وقت میں یورینیم کی افزودگی اور مذاکرات نہیں کر سکتا۔

خیال رہے کہ اسرائیلی وزیر اعظم  کا یہ بیان ایسے وقت میں سامنے آیا ہے جب اسرائیل کے دفاعی و انٹیلی جنس حکام واشنگٹن میں جوہری مذاکرات کی بحالی میں شرکت کیلئے پہنچے ہوئے ہیں۔

واضح رہے کہ ایران کے جوہری پروگرام میں مسلسل پیشرفت عالمی طاقتوں کیلئے تشویش کا باعث بنی ہوئی ہے، عالمی طاقتیں ویانا میں ایران کے ساتھ 2015 کے ٹوٹے ہوئے معاہدے کو بحال کرنے کی امید میں بیٹھی ہیں۔