دنیا پاکستان کو توڑنا چاہتی تھی مگر ہم پاکستان کو بچائیں گے ، آصف زرداری

لاہور میں ورکرز کنونشن سے خطاب کرتے ہوئے سابق صدرآصف زرداری نے کہا کہ پنجاب میں الیکشن مشکل نہیں ہماری کمزوریاں سامنے آتی ہیں۔پیپلزپارٹی نے این اے 133 میں اچھا رزلٹ دیا۔مجھے 50ہزار ووٹوں کی امید تھی۔اگر ٹرن آؤٹ بڑھا لیتے تو 50 ہزار ووٹ لے سکتے تھے۔ہم کامیابی کی طرف جارہے تھے کہ آر او الیکشن کرواکر ہم سے انتخاب چھینے گئے۔

انہوں نے کہا کہ   ن لیگ نے برادری اور اپنی پسند سے حلقہ بندیاں قائم کی ہیں،ہم حلقہ بندیاں تبدیل کریں گے،ہم ہر گلی محلے میں ان سے لڑیں گے۔  پورے پاکستان میں ایسی کوئی جگہ نہیں جہاں بھٹو صاحب لوگوں کے دلوں میں بستے نہ ہوں،میں نے پیپلزپارٹی کے مشکل وقت میں جیل کاٹی۔

سابق صدر نے مزید کہا کہ  اس وقت پاکستان بہت بڑے خطرے میں ہے،دنیا پاکستان کو توڑنا چاہتی تھی مگر ہم پاکستان کو بچائیں گے۔

خیال رہے کہ این اے 133 میں ہونے والے ضمنی الیکشن میں مسلم لیگ ن کی امیدوار شائستہ پرویز ملک نے  کامیابی حاصل کی تھی۔ جبکہ  پاکستان پیپلز پارٹی کے امیدوار چوہدری اسلم گل نے 32 ہزار 313 ووٹ لیکر  دوسرے نمبر پر رہے۔  عام انتخابات 2018 میں پیپلز پارٹی کو اس حلقے سے صرف ساڑھے پانچ ہزار کے قریب ووٹ ہی ملے تھے۔