کراچی: اورنگی میں جعلی  پولیس مقابلہ ، 14 سالہ طالبعلم ہلاک 

تفصیلات کے مطابق مبینہ طور پر جعلی پولیس مقابلے کا مقدمہ اورنگی ٹاون تھانہ میں درج کر لیا گیا ۔ مقدمہ مقتول کے چچا کی مدعیت میں درج کیا گیا ہے۔ مقدمے میں قتل، اقدام قتل، دہشتگردی کی دفعات شامل کی گئی۔

 مبینہ جعلی پولیس مقابلے میں ہلاک ہونے والے طالب علم کے لواحقین کا دعویٰ ہے کہ ارسلان کے پاس کوئی اسلحہ نہیں برآمد ہوا اور پولیس نے جعلی مقابلے میں ارسلان کو قتل کردیا۔

اس سے قبل پولیس حکام نے دعویٰ کیا تھا کہ موٹرسائیکل سوار دو مبینہ ملزمان کو رکنے کا اشارہ کیا  لیکن وہ نہ رکے، اس دوران مبینہ مقابلہ ہوا جس میں ایک ملزم مارا گیا اور ایک فرار ہوگیا  تاہم پولیس کا ابتدائی بیان خود ڈی آئی جی ویسٹ نے رد کردیا۔

ڈی آئی جی ناصر آفتاب نے بتایا کہ مشکوک مقابلہ ناکے پر نہیں بلکہ اس سے فاصلے پر ہوا اور کرنے والا پولیس اہلکار بھی وردی میں نہیں تھا بلکہ سادہ لباس تھا، مشکوک مقابلے کے بعد فائرنگ کرنے والے اہلکار توحید کو حراست میں لے لیا گیا جبکہ  ایس ایچ او اورنگی کو معطل کردیا گیا ہے۔ 

ڈی آئی جی ویسٹ کے مطابق ایس ایس پی سینٹرل، ایس ایس پی انویسٹی گیشن سینٹرل اور ایس پی گلبرگ پر مشتمل ایک تین رکنی کمیٹی بنادی ہے جو 24 گھنٹوں میں رپورٹ دے گی جس پر فوری ایکشن ہوگا۔ مقتول کا پوسٹ مارٹم مکمل کرنے کے بعد لاش ورثا کے حوالے کردی گئی ہے۔