پاکستان میں زرمبادلہ کے ذخائر کی صورتحال مستحکم ہے: وزیراعظم 

 تفصیلات کے مطابق اسلام آباد میں میکرو اکنامک مشاورتی گروپ کے اجلاس کی صدارت کرتے ہوئے  وزیراعظم عمران خان نے کہا کہ حکومت گزشتہ حکومت کی چھوڑی ہوئی معاشی تباہی اور کورونا وائرس کی عالمی وبا دونوں سے بہتر انداز میں  عہدہ برآ ہوئی ہے اور اب معیشت پائیداری کے ساتھ ترقی کررہی ہے۔

 انہوں  نے کہا کہ بڑے پیمانے پر مصنوعات کی تیاری، تیار اشیا، آمدن اور برآمدات  میں اضافے سے یہ ظاہر ہوتا ہے کہ حکومت کی جانب سے کئے گئے پالیسی اقدامات کے ثمرات ملنا شروع ہوگئے ہیں۔

 وزیراعظم کا کہنا تھا کہ رواں مالی سال کے اختتام تک معیشت گزشتہ مالی سال کی نسبت زیادہ تیزی سے ترقی کرے گی۔

اجلاس کو ملک کی موجودہ اقتصادی صورتحال، معاشی اشاریوں میں بہتری اور معیشت کو مزید مستحکم بنانے کےلئے جامع حکمت عملی سے متعلق آگاہ کیا گیا۔اجلاس کو یہ بھی بتایا گیا کہ غیر معمولی کارکردگی دکھانے اور موجودہ حکومت کی جانب سے گزشتہ حکومتوں کے چھوڑے معاشی بحران سے نمٹنے پر پاکستان کی عالمی سطح پر پذیرائی ہوئی ہے ۔

 اس کے ساتھ جب کورونا وائرس کے سنگین اثرات کے سبب معیشتیں کمزور ہورہی تھیں تو پاکستان نے نہ صرف عالمی وبا پرقابو پایا بلکہ اپنی شرح ترقی کو 3.9 فیصد  پر برقرار بھی رکھا۔