عراق میں اسپتال کے باہر زوردار دھماکا،متعدد ہلاک

غیر ملکی خبر رساں ادارے کے مطابق عراقی فوج نے بتایا کہ عراق کے جنوبی شہر بصرہ کے مرکز میں ہونے والے ایک دھماکے میں کم از کم چار افراد ہلاک اور چار دیگر زخمی ہو گئے ہیں۔

ایک بیان میں، فوج نے کہا کہ دھماکہ خیز مواد موٹر سائیکل میں نصب تھا۔

عراق کے سیکیورٹی میڈیا سیل، ملک کی سیکیورٹی فورسز سے وابستہ ایک آؤٹ لیٹ نے کہا کہ چار افراد موٹرسائیکل کے قریب دو کاروں میں آگ لگنے کے نتیجے میں ہلاک ہوئے۔

سیکیورٹی میڈیا سیل کے سربراہ سعد مان نے ایک بیان میں کہا، "فورنزک ماہرین اور خصوصی تکنیکی ٹیمیں حادثے کی نوعیت کا تعین کرنے اور حادثے کی نوعیت کے بارے میں مزید تفصیلات دینے کے لیے ابھی بھی جائے حادثہ پر موجود ہیں۔"

انہوں نے مزید کہا کہ "سیل تحقیقات اور تکنیکی رپورٹس مکمل کرنے کے بعد وسیع تر تفصیلات کا بعد میں اعلان کرے گا۔"

ایک بیان میں، ایک سینئر سیکیورٹی زرائع (سورس) نے مقامی میڈیا کو بتایا کہ  یہ دھماکہ الصمود چوراہے پر شہر کے مرکز میں الجمہری اسپتال کے سامنے ہوا ہے۔

دھماکے کی ذمہ داری فوری طور پر کسی نے قبول نہیں کی بصرہ کے گورنر اسد العدانی نے صحافیوں کو بتایا کہ دھماکے میں داعش ملوث ہوسکتی ہے۔

اس سے قبل پولیس اور صحت کے ذرائع نے غیر ملکی خبر رساں ادارے کو بتایا تھا کہ دھماکے میں 20 دیگر افراد زخمی ہوئے ہیں۔

عراق میں 10 اکتوبر کو ہونے والے پارلیمانی انتخابات کے بعد سیاسی عدم استحکام میں اضافہ ہوا ہے جس میں مقبولیت پسند رہنما مقتدیٰ الصدر سب سے زیادہ فاتح بن کر ابھرے ہیں۔