دین کے نام پر ظلم کرنیوالوں کو نہیں چھوڑینگے: وزیراعظم

تفصیلات کے مطابق  اسلام آباد میں تقریب سے خطاب کرتے ہوئے وزیر اعظم عمران خان کا کہنا تھا کہ مدینہ کی ریاست میں رحم اورانصاف تھا، ایسا کسی معاشرے میں نہیں ہوتا خود الزام لگایا اور خود ہی سزا دے دی۔

ان کا کہنا تھا کہ انسانوں کے معاشرے میں انصاف ہوتا ہے، جانوروں کے معاشرے میں کمزور کی کوئی جگہ نہیں ہوتی، ہمارے نبی ﷺ نے مدینہ کی ریاست میں کمزور طبقے کی ذمہ داری لی، مدینہ کی ریاست میں رحم اورانصاف تھا۔

انہوں نے کہا ہے کہ سانحہ اے پی ایس کے بعد ملک میں دہشت گردی کے خلاف غصہ آیا تھا، اس کے بعد پاکستان دہشت گردی کیخلاف جنگ جیتا۔

وزیر اعظم عمران خان کا تقریب سے خطاب کرتے ہوئے کہنا تھا کہ پاکستان واحد ملک جواسلام کے نام پربنا تھا۔

ان کا کہنا تھا کہ بھارت میں بھارتیہ جنتا پارٹی کی حکومت میں کسی کو گائے کا گوشت کھانے پر مار دیا جاتا ہے، بھارت میں ایسے واقعات دیکھ کر ہمیں بہت تکلیف ہوتی ہے۔

 ان کا مزید کہنا تھا کہ بھارتی میڈیا جب ایسے واقعات دکھاتا ہے تو کہتا ہے پاکستان میں بھی ایسا ہوتا ہے، پاکستان میں ایسا نہیں ہوتا اور جب تک میں زندہ ہوں انشااللہ ایسے واقعات نہیں ہونے دونگا۔