بلدیاتی انتخابات : الیکشن کمیشن نے وزیراعظم کو دورہ پشاور سے روک دیا

تفصیلات کے مطابق بلدیاتی انتخابات کے حوالے سے وزیراعظم کو پشاور دورہ نہ کرنے کی ہدایت کی گئی ہے ۔ الیکشن کمیشن  کے مطابق خیبرپختونخوا میں 19دسمبر کو بلدیاتی انتخابات ہونے جارہے ہیں  ، پہلے مرحلے میں پشاور میں بھی بلدیاتی انتخابات کاانعقاد کیاجارہاہے  لہذا انتخاب کے شیڈول کے اعلان کے بعد وزیراعظم کا متعلقہ مقام کادورہ کرنا ضابطہ اخلاق کی خلاف وزری تصور ہوگا ۔ 

الیکشن کمیشن کاکہنا ہے کہ صدرمملکت ،وزیراعظم ،گورنرز انتخابی شیڈول کے اعلان کے بعد کسی بھی ڈویلپمنٹ سکیم کے لئے متعلقہ حلقے کادورہ نہیں کرسکتے ،  ضابطہ اخلاق کی خلاف ورزی کرنے پر قانونی چارہ جوئی کی جاسکتی ہے ۔

الیکشن کمیشن الیکشن ایکٹ کے سیکشن 233اور 234 کے تحت کارروائی کرسکتا ہے ، الیکشن کمیشن نے وزیراعظم عمران خان کو یاددہانی نوٹس بھی جاری کردیا ۔ 

خیال  رہے کہ وزیراعظم عمران خان نے پاکستان کارڈ انشی ایٹو کی لانچنگ کے لئے آج پشاور کادورہ کرناتھا۔ 

دوسری جانب وزیراعظم عمران خان کے دورہ پشاور پر الیکشن کمیشن کے نوٹس کے حوالے سے خیبرپختونخوا کے وزیر تعلیم کامران بنگش کا بیان سامنے آگیا  ہے ۔ کامران بنگش  کا کہنا ہے کہ وزیراعظم عمران خان کا دورہ پشاور خالصتاً سرکاری نوعیت کا ہے، یہ روزمره امور مملکت کا حصہ ہے جس پر کوئی پابندی نہیں ، وزیراعظم عمران خان صرف گورنر ہاؤس کی ایک سرکاری تقریب میں شریک ہوں گے۔

ان کامزید کہنا تھا کہ وزیراعظم عمران خان دورہ پشاور میں کسی انتخابی یا عوامی اجتماع میں شرکت نہیں کر رہے،الیکشن کمیشن آئینی ادارہ ہے جس کا دلی احترام کرتے ہیں،  بلدیاتی انتخابات صرف خیبرپختونخوا کے چند اضلاع میں ہو رہے ہیں،وزیراعظم عمران خان کا فلاحی پروگرام پورے پاکستان کے غریب عوام کے لئے ہے۔