وزیراعظم کا مشترکہ چیلنجز سے نمٹنے کیلئےعلاقائی سطح پرحکمت عملی وضع کرنےپرزور

تفصیلات کے مطابق اسلام آباد میں ''اسلام آباد CONCLAVE 2021'' کے افتتاحی اجلاس سے خطاب کرتے ہوئے وزیر اعظم عمران خان نے کہا کہ کشمیر اور افغانستان سمیت خطے کے بڑے مسائل صرف مذاکرات سے ہی حل کئے جا سکتے ہیں۔

وزیر اعظم نے عالمی رہنماؤں پر زور دیا کہ وہ افغانستان میں ممکنہ انسانی بحران سے بچنے کیلئے اپنا کردار ادا کریں اور افغانستان کے منجمد اثاثے بحال کئے جائیں۔افغانستان کو انسانی المیہ سے بچانا ہے۔

انہوں نے کہا کہ ہم نے بھارت کے ساتھ امن کیلئے ہر ممکن کوشش کی لیکن بدقسمتی سے مودی کے زیر قیادت بھارت کی حکومت نے ہر اقدام کو ہماری کمزوری سمجھا۔ہمارے مستقبل کے لیے ضروری ہے کہ افغانستان میں امن ہو، ایشیا سے پاکستان کا رابطہ افغانستان کے امن سے جڑا ہے، سی پیک ہمارے لیے بہت اہم ہے جس کا فائدہ اٹھا رہے ہیں ۔ دنیا میں نئے بلاکس بن رہے ہیں، پاکستان نئے بلاکس کو بننے سے روکنے کی پوری کوشش کرے گا،ہم نہیں چاہتے کہ کسی بلاک کا حصہ بنیں۔ 

وزیر اعظم نے کہا کہ جغرافیائی اور اقتصادی حکمت عملی کے تحت پاکستان اپنی تجارت میں اضافے کیلئے علاقائی ملکوں کے ساتھ روابط بڑھانا چاہتا ہے، انہوں نے کہا کہ اس ضمن میں ہم چین پاکستان اقتصادی راہداری سے زیادہ سے زیادہ فوائد حاصل کرنے کیلئے کوشاں ہیں۔

انہوں نے مزید  کہا کہ موسمیاتی تبدیلی ایک اور چیلنج ہے جس کے حل کیلئے ترجیحی بنیادوں پر اجتماعی حکمت عملی کی ضرورت ہے۔

اس موقع پر خطاب کرتے ہوئے وزیر خارجہ شاہ محمود قریشی نے کہا کہ جنوبی ایشیاء میں خوشحالی کیلئے علاقائی تعاون ناگزیر ہے، انہوں نے کہا کہ سارک کو بھی محدود سیاسی ایجنڈے سے آزاد کر کے بحال کرنے کی ضرورت ہے۔