گاڑیاں خریدنے کے شوقین افراد کیلئے بری خبر

مہنگائی نے گاڑیوں کے خریداروں کیلئے ایک اور مشکل کھڑی کردی ہے۔ حکومت نے گاڑیوں پر فیڈرل ایکسائز ڈیوٹی ڈبل کردی۔

تفصیلات کے مطابق ایک ہزار سی سی گاڑی پر 60 ہزار تک فیڈرل ایکسائرز ڈیوٹی کی مد میں ادا کرنا ہونگے۔ اس سے قبل ایک ہزار سی سی گاڑی پر زیرو فیصد ایف ای ڈی عائد تھی۔ 13 سو سی سی سے زائد گاڑی پر فیڈرل ڈیوٹی اڑھائی فیصد سے بڑھا کر 5 فیصد کردی گئی۔ 13 سو سی سی کار کی خریدنے کیلئے 1 لاکھ بیس ہزار فیڈرل ڈیوٹی پڑے گی۔ 
اسی طرح 2000 سی سی سے بڑی گاڑیوں پر فیڈرل ڈیوٹی 5 فیصد سے بڑھا کر 10فیصد کردی گئی۔ 2 ہزار سی سی گاڑی کی خریداری کیلئے 4 لاکھ اسی ہزار روپے فیڈرل ڈیوٹی پڑے گی۔ لاہور کار ڈیلر فیڈریشن نے فیڈرل ایکسائز ڈیوٹی میں اضافہ مسترد کردیا۔ صدر لاہور کار ڈیلر فیڈریشن شہزادہ سلیم کا کہنا ہے کہ فیڈرل ایکسائز ڈیوٹی میں اضافہ فی الفور واپس لیا جائے، فیڈرل ایکسائز ڈیوٹی میں اضافہ واپس نہ لیا تو ملک گیر بھرپور احتجاج کریں گے۔

ان کا مزید کہنا تھا کہ مہنگائی سے 35 فیصد کار ڈیلر کاروبار بند کرچکے ہیں،گاڑیوں کا کاروبار پہلے ہی ٹھپ ہے، ایکسائز ڈیوٹی بڑھانے سے کاروبار مزید کم ہوگا۔