وزیراعظم عمران خان کوابوظہبی کے ولی عہد کا ٹیلیفون، لاہور میں ہونے والے دہشت گرد حملے کی شدید مذمت

تفصیلات کے مطابق  وزیراعظم عمران خان کوابوظہبی کے ولی عہد نے  ٹیلیفون کیا ہے، ابوظہبی کے ولی عہد نے 20 جنوری کو لاہور میں ہونے والے دہشت گرد حملے کی شدید مذمت کی، ابوظہبی کے ولی عہد محمد بن زیاد نے دھماکے کے متاثرین سے اظہارتعزیت کیا اور  دھماکے میں زخمی افراد کی جلد صحتیابی کی دعا کی۔

وزیراعظم نے تعزیت اور حمایت کے بھرپور اظہار پر ابوظہی کے ولی عہد کا شکریہ ادا کیا۔ وزیراعظم عمران خان نے دہشت گردی سے نمٹنے کےلیے پاکستان کے پختہ عزم کا اعادہ کیا۔

وزیر اعظم عمران خان نے کہا کہ  دہشت گرد حملوں کے مرتکب افراد کو انصاف کے کٹہرے میں لایا جائے گا۔ وزیراعظم نے متحدہ عرب امارات کے ساتھ تعلقات کو مزید مضبوط بنانے اور رابطے جاری رکھنے کی خواہش کا اظہار کیا۔

وزیر اعظم آفس کی جانب سے جاری کردہ اعلامیہ میں کہا گیا ہے کہ  دونوں ممالک کی قیادت کے درمیان بات چیت برادرانہ تعلقات کی عکاس ہے۔