این سی اوسی  نے ملک بھر میں موبائل ویکسی نیشن مہم کا آغاز کردیا

تفصیلات کے مطابق وفاقی وزیر برائے ترقی و منصوبہ بندی اور سربراہ  نیشنل کمانڈ اینڈ آپریشن سینٹر (این سی او سی) اسد عمر نے شہریوں کو ویکسین لگوانے کی ہدایت کرتے ہوئے ملک میں موبائل ویکسین مہم شروع کرنے کا اعلان کردیا ۔

اسلام آباد میں این سی او سی اجلاس کے بعد کورونا وائرس کے حوالے سے بریفنگ دیتے ہوئے اسد عمر  نے کہا کہ اگر اجتماعی طور پر دیکھا جائے تو ظاہر ہوتا ہے کہ وہ علاقے یا شہر جہاں ویکسینیٹڈ افراد کی تعداد زیادہ ہے وہاں کورونا وائرس کی پانچویں لہر نے کم تباہی مچائی۔

انہوں نے شہریوں کو ویکسین لگوانے کی ہدایت کرتے ہوئے اعلان کیا ہے کہ این سی او سی ویکسین مہم کو تیز کرنے کے لیے موبائل ویکسین کا آغاز کر رہی ہے، جس کے ذریعے 55 ہزار سے زائد موبائل ٹیمیں گھر گھر جاکر شہریوں کو ویکسین لگائیں گی۔

وفاقی وزیر  برائے منصوبہ بندی اسد عمر نے  کہا کہ اس مہم کا آغاز آج (یکم فروری) سے ہورہا ہے اور یہ دو ہفتے تک جاری رہے گی اس دوران ساڑھے 3 کروڑ سے زائد افراد کو ویکسین لگائی جائے گی اور یہ ایک بڑا ہدف ہے۔

اسد عمر نے کہا کہ ملک میں اٹھارہ کروڑ افراد کی ویکسی نیشن مکمل ہو چکی ہے، انہوں نے  شہریوں کو ہدایت کی کہ وہ افراد جنہوں نے اب تک ویکسین نہیں لگوائی ہے، جلد از جلد ویکسین لگوائیں، اور جو افراد مکمل ویکسی نیشن کروا چکے وہ بوسٹر شاٹ لازمی لگوائیں۔ وہ افراد جو ویکسین کی ایک خوراک لے چکے ہیں، یہ ٹیمز ان کو بھی دوسری خوراک لگائیں گی۔

وزیر اعظم کے معاون خصوصی برائے صحت ڈاکٹر فیصل سلطان نے کہا کہ ویکسین کے آغاز کو ایک سال ہوچکا ہے اور دو سال قبل شروع ہونے والی اس بیماری سے جان چھڑوانے کا سب سے آسان طریقہ ویکسین ہے۔ جن کو ابھی تک ویکسین نہیں لگی ، وہ مہم کے تحت موقع ضائع نہ کریں۔ کورونا سے نجات کا واحد حل ویکسی نیشن ہی ہے۔

ڈاکٹر فیصل سلطان  نے کہا  کہ بوسٹر شارٹ لگوانا اس لیے بھی لازمی ہے کہ بعض اوقات ویکسی نیشن کے باوجود قوت مدافعت مضبوط نہیں ہو پاتی لہذا موجودہ وائرس سے لڑنے کے لیے یہ اضافی خوراک لگوانا بھی لازمی ہے۔

 ملک  میں  کورونا سے مزید 5ہزار 327 کیسز رپورٹ 

پاکستان میں گزشتہ 24 گھنٹوں کے دوران 32 افراد انتقال کرگئے جبکہ 5ہزار 327 کیسز رپورٹ ہوئے ہیں ۔ نیشنل کمانڈ اینڈ آپریشن سینٹر (این سی او سی) کے مطابق ملک میں کورونا وائرس کے کُل مریضوں کی تعداد 14 لاکھ 25ہزار039 ہو چکی ہے ۔ ملک میں کورونا سے اموات کی مجموعی تعداد 29ہزار 269 ہوگئی ہے ۔

ملک میں  کوروناایکٹو کیسز کی تعدادایک لاکھ 4ہزار045ہوگئی ۔ این سی اوسی کے مطابق ملک میں کوروناکےمثبت کیسزکی 12.46فیصدرہی ، جبکہ 1455مریضوں کی حالت تشویشناک ہے ۔