جہلم: ڈی ایچ کیو ہسپتال میں بدانتظامی پر ایم ایس کو عہدے سے ہٹا دیا گیا

جہلم : وزیراعلیٰ پنجاب مریم نواز شریف کی ہدایت پر صوبائی معاون خصوصی شعیب مرزا کی قیادت میں سی ایم انسپکشن ٹیم نے جہلم اور اس کے گردونواح کے چار ہسپتالوں کا ایک ہی دن میں اچانک وزٹ کیا۔

دورے کا مقصد ہسپتالوں میں انتظامات، سہولیات اور مریضوں کی شکایات کا جائزہ لینا تھا۔

دورے کے دوران سی ایم انسپکشن ٹیم نے  ڈسٹرکٹ ہیڈ کوارٹر اسپتال ( ڈی ایچ کیو) جہلم ،تحصیل ہیڈ کوارٹر( ٹی ایچ کیو )سوہاوہ، گوجر خان اور کھاریاں کے تحصیل ہسپتالوں کا وزٹ کیا۔

مریضوں کی شکایات اور ٹیم کے مشاہدات کے بعد ڈی ایچ کیو ہسپتال جہلم کے ایم ایس کو عہدے سے ہٹانے کے احکامات جاری کر دیے گئے۔

ٹی ایچ کیو سوہاوہ کے ایم ایس اور عملے کو انتظامات بہتر نہ ہونے پر سخت وارننگ دی گئی۔گوجر خان اور کھاریاں کے ہسپتالوں میں ٹیم نے انتظامات پر اطمینان کا اظہار کیا۔ 

سی ایم انسپکشن ٹیم نے ہسپتالوں میں سہولیات اور مریضوں کی سہولت کے لیے فوری بہتری کے اقدامات کرنے کی ہدایت بھی دی۔

صوبائی معاون خصوصی شعیب مرزا نے کہا کہ وزیراعلیٰ کی ہدایت ہے کہ ہر ہسپتال میں مریضوں کو بروقت اور معیاری سہولیات فراہم کی جائیں اور تمام متعلقہ عملہ اپنی ذمہ داریوں کو بروقت پورا کرے۔