لاہور:پولیو وائرس کاخطرہ بدستور موجود،سیوریج سسٹم میں وائرس کی تصدیق

لاہور شہر کے سیوریج سسٹم میں پولیو وائرس دوبارہ تصدیق ہونے کے بعد بیماری کے پھیلاؤ کے خطرات برقرار ہیں۔

تفصیلات کے مطابق صوبائی محکمہ صحت کے ذرائع کا کہنا ہے کہ پولیو کے خاتمے کے لیے جاری مہمات کے باوجود وائرس کی سرگرمی ابھی مکمل طور پر ختم نہیں ہوئی۔ سال 2025 کے آخر میں جمع کیے گئے سیوریج سیمپلز میں وائرس مثبت پایا گیا۔

پنجاب ہیلتھ ڈیپارٹمنٹ کے حکام نے بتایا کہ پولیو وائرس کی موجودگی کی تصدیق آؤٹ فال روڈ اور گلشن راوی کے علاقوں سے جمع کیے گئے سیمپلز میں سے ہوئی، جبکہ ملتان روڈ اور محمود بوٹی کے سیمپلز میں وائرس موجود نہیں تھا۔

ماہرین کے مطابق یہ سیمپلز معمول کی نگرانی کے تحت لاہور کے سیوریج نیٹ ورک سے جمع کیے گئے تھے تاکہ شہر میں پولیو وائرس کی سرگرمی پر مسلسل نظر رکھی جا سکے۔

حکام نے والدین اور سرپرستوں پر زور دیا ہے کہ وہ اپنے بچوں کی حفاظتی ویکسین مکمل کروائیں تاکہ پولیو کے پھیلاؤ کو روکا جا سکے۔